Á­hyggju­fullur ná­granni lýsir stöðugu partýstandi

Lögregla leitar nú logandi ljósi að fólki sem tengist skotárásinni, þar á meðal þeim sem hæfði mann og slasaði alvarlega. Grímur Grímsson yfirlögregluþjónn segir aukið viðbragð hjá lögreglu til að tryggja öryggi almennings á höfðuborgarsvæðinu.

Nokkrum byssuskotum var hleypt af á fimmta tímanum í nótt og voru lætin svo mikil að börn vöknuðu og voru skelkuð. Eitt skotið hafnaði í rúðu á íbúð fólks í nálægu íbúðahúsi. Búið er að setja plötu í stað rúðunnar sem brotnaði. Íbúarnir þar tengjast málinu ekki með neinum hætti. Þar býr margra barna fjölskylda.

Sá sem slasaðist var fluttur á Landspítalann. Hann er ekki í lífshættu að sögn lögreglu.

Flestar íbúðirnar í fjölbýlishúsinu við Silfratjörn 2 eru í eigu Félagsbústaða og íbúðafélagsins Bjargs. Umrædd íbúð er í eigu Félagsbústaða.

Taldi barn sitt hafa fengið martröð

Íbúi í húsinu hefur orðið var við mikið partýstand og óreglu í íbúð á 3. hæð hússins. Hann vildi ekki koma fram undir nafni til að gæta öryggis síns og barna. Hann telur að þar sé ungt fólk, allt niður í sautján til átján ára, á ferðinni. Dóttir hans vaknaði við byssuhvellinn í nótt og hefur fjölskyldan áhyggjur af öryggi sínu eftir atburði næturinnar.

Sömu sögu er að segja af móður í húsinu sem fréttastofa ræddi við í morgun. Barn hennar vaknaði við lætin í nótt og vakti foreldra sína. Lýsingar barnsins voru þannig að foreldrarnir héldu í fyrstu að barnið hefði vaknað sökum martraðar. 

Rannsóknin er sögð á frumstigi og því ekki með öllu ljóst hvað hafi búið að baki árásinni. Grunur er um að hún tengist útistöðum tveggja hópa. Grímur segir ekki mikla áhættu fyrir almenning vegna þess að átökin tengist útistöðum tveggja hópa.

Vegna málsins biðlar lögregla til bæði íbúa og forráðamanna fyrirtækja í Úlfarsárdal og Grafarholti að athuga með myndefni í öryggis- og eftirlitsmyndavélum á svæðinu og koma því til lögreglu ef svo ber undir.

Lögregla horfir til tímans frá því á miðnætti í gærkvöldi og til klukkan sjö í morgun. Lögreglan þiggur allar ábendingar um grunsamlegar mannaferðir. Fram kom í tölvupósti til starfsfólks Dalskóla í hverfinu í morgun að mörg börn hefðu vaknað upp við skothvell og séð sjúkrabíla, lögreglubíla og blóð á vettvangi.

Fréttin hefur verið uppfærð en í fyrri útgáfu kom fram að íbúðin væri í eigu Bjargs, ekki Félagsbústaða.