Bana­slys á Suður­lands­vegi 2021: Nýkominn með bílpróf þegar hann tók fram úr

Rannsóknarnefnd samgönguslysa birti í dag skýrslu sína um slysið sem varð síðdegis 20. desember 2021.

Um slysið segir að Toyota Land Cruiser bíl hafi verið á leið austur Suðurlandsveg, um níu kílómetra austan við Selfoss. Á sama tíma hafi Volvo XC 60 fólksbíl verið ekið úr gagnstæðri átt vestur Suðurlandsveg þar sem hann var í framúrakstri á vinstri akrein og að lokum lent framan á Land Cruiser-jeppanum í hörðum árekstri.

Þá segir að ökumaður jeppans hafi látist tveimur vikum síðar á sjúkrahúsi af völdum áverka sem hann hlaut í slysinu. Einn farþegi var í Toyota-bílnum og slasaðist hann alvarlega, en ökumaður Volvo-bílsins var einn í bílnum og slasaðist lítillega.

„Í orsakagreiningu skýrslunnar kemur fram að Volvo bifreiðinni var ekið töluvert yfir hámarkshraða fram úr röð bifreiða. Ökumaður hennar gekk ekki úr skugga um að það væri hægt án hættu gagnvart annarri umferð. Hálka var á veginum og hafði sennilega áhrif á beygju- og hemlunargetu Volvo bifreiðarinnar,“ segir um orsakir slyssins.

Fór fram úr þremur í einu

Fram kemur í skýrslunni að aðstæður hafi verið á þann veg að það hafi verið eins stigs frost, myrkur, hrímþoka og hálka. Rannsókn hafi leitt í ljós að þremur sekúndum fyrir slysið hafi hraði Volvo-bílsins verið orðinn 127 kílómetra hraði, en við árekstur 114 kílómetrar á klukkustund.

„Að sögn vitna var Volvo bifreiðinni ekið fram úr þremur ökutækjum í einu áður en áreksturinn varð. Fyrst var henni ekið fram úr vöruflutningabifreið með tengivagn, þá fólksbifreið og að lokum pallbifreið með kerru. Að sögn sömu vitna náði ökumaður Volvo bifreiðarinnar ekki að beygja aftur inn á hægri vegarhelminginn eftir þriðja framúraksturinn og ók framan á Toyota bifreiðina sem ekið var úr gagnstæðri átt. Vinstri framhorn bifreiðanna skullu saman í hörðum árekstri,“ segir í skýrslunni.

Reynslulítill og óvanur akstri í þjóðvegum

Þá segir ennfremur að ökumaður Volvo-bílsins hafi verið reynslulítill, nýlega öðlast ökuréttindi og hafði því haft litla reynslu af akstri á þjóðvegum.

Rannsóknarnefndin áréttar í skýrslunni hversu brýnt sé að ökumenn sýni fyllstu aðgæslu við framúrakstur. 

„Of hraður akstur er ein af algengustu orsökum banaslysa í umferðinni og ítrekar nefndin mikilvægi þess að ökumenn virði lögboðinn hámarkshraða og aðstæður hverju sinni. Að vetrarlagi geta aðstæður á vegum landsins breyst hratt og hálka myndast þegar hitastig fellur. Ökumenn þurfa að vera vakandi fyrir breytingum á ástandi vega,“ segir í skýrslunni.