Mál Alberts komið til á­kæru­sviðs

Þetta staðfestir Bylgja Hrönn Baldursdóttir, lögreglufulltrúi hjá kynferðisbrotadeild Lögreglunnar á höfuðborgarsvæðinu, í samtali við Vísi.

Albert, sem leikur með Genóa á Ítalíu og öllu jöfnu íslenska karlalandsliðinu, var kærður fyrir kynferðisbrot um miðjan ágúst síðastliðinn og fær ekki að koma fram fyrir Íslands hönd á fyrr en mál hans hefur verið leitt til lykta.

Albert hefur hefur hafnað öllum ásökunum um kynferðisbrot.

„Ég er saklaus af þeim ásökunum sem komið hafa fram. Ég mun ekki tjá mig frekar á meðan málið er til rannsóknar,“ sagði Albert í stuttri yfirlýsingu til fjölmiðla þann 24. ágúst.

Stuttur rannsóknartími

Bylgja Hrönn segir að rannsókn á máli Alberts hafi formlega verið lokið í gær og það sent áfram til ákærusviðs. Rannsóknartími málsins var því aðeins um einn mánuður, en fáheyrt er að rannsóknir kynferðisbrota taki svo skamman tíma.

Í skýrslu starfshóps Ríkissaksóknara um málsmeðferðartíma kynferðisbrota segir að meðalafgreiðslutími lokinna mála hjá í lögregluhluta kerfisins hafi verið 342,9 dagar árið 2021.

Bylgja Hrönn segir að ýmislegt geti skýrt skamman rannsóknartíma en að hún geti ekki tjáð sig um einstök mál.

Mál Alberts er sem áður segir komið á borð ákærusviðs. Þar verður ákveðið hvort það þarfnist frekari rannsóknar, rannsókn verði hætt eða það verði sent áfram til héraðssaksóknara til ákærumeðferðar.