Dæmi um börn í öðrum bekk með hnífa í grunn­skólum

Aukinn hnífaburður ungmenna hefur verið mikið til umræðu og lögregla hefur ítrekað lýst yfir áhyggjum af þeirri þróun. Á dögunum fengu foreldrar grunnskólabarna í Kópavogi bréf þar sem þeim var tjáð að borið hefði á því að unglingar gengju með hnífa á sér og tækju þá með í skólann.

Öryggis-og löggæslufræðingur fagnar aukinni umræðu.

„Þarna eru skólayfirvöld í Kópavogi væntanlega að sýna eitthvað frumkvæði sem er bara aðdáunarvert. Um að við foreldrarnir tölum við börnin og að þau fái skýr skilaboð um að þetta sé algjörlega óásættanlegt.“

Sérgrein Eyþórs er öryggi starfsfólks en hann segir mikið mæða á kennurum og starfsfólki skóla sem oft þurfi að stíga inn í átök.

„Þetta er alveg ofboðslega mikið af fólki sem er að vinna sína vinnu, sem er nógu erfið fyrir, að það sé ekki núna að bætast við að krakkar, sem margir hverjir eru í miklu uppnámi og sumir hverjir þokkalega stórir, bara eins og fullorðið fólk, séu farnir að ganga með hnífa. Ekki kannski allir, en nógu margir til að við þurfum að fara hafa verulegar áhyggjur.“

Veit af tugum tilfella

Eyþór segir að langoftast sé um unglinga að ræða en það sé þó ekki algilt, börn á öllum aldri hafi mætt með hnífa í skólann.

„Það eru dæmi um krakka i öðrum og þriðja bekk með hníf. Fjöldi tilfella er óljós en þetta er svo alvarlegt að eitt tilfelli er í raun einu tilfelli of mikið. Ég tala nú ekki um þessa tugi sem maður veit um, það er bara allt of mikið. Við þurfum að fara stíga niður, ég held að það bara finni það allir að það sem er að gerast í þjóðfélaginu, það sem er að gerast hérna um helgar, það er líka að gerast í skólum.“

Eyþór kallar eftir harðari viðurlögum við vopnalagabrotum og að samfélagið allt taki höndum saman til að útrýma hnífaburði.

„Sem sérfræðingur í vinnuvernd og öryggi starfsfólks þá brennur það á mér að losna við hnífana úr skólnunum. Þar þarf að hugsa um þetta sem hverja aðra ógn, hún er alvarleg og það ber að taka hana alvarlega. Við þurfum öll að leggjast á eitt að fara að taka fyrir þetta, að krakkar séu að mæta með hnífa í skólann.“

Þeir eru svo aðgengilegir, meðfærilegir og ógeðslega lúmskir því þeir eru stórhættulegir

Hvetur til samtals við börnin

Amanda Karima Ólafsdóttir, deildarstjóri frístundadeildar á Menntasviði Kópavogsbæjar segir að þrátt fyrir að tilfellin hafi sem betur fer ekki verið mörg hafi þótt ástæða til að senda foreldrum grunnskólabarna bæjarins bréf nú í uppafi skólaárs varðandi hnífaburð.

„Þar sem tilfellin hafa komið upp þá fannst okkur ástæða til að senda bréfið út til foreldra eða forsjáaðila barna til upplýsinga og til að skerpa á þeim reglum sem gilda er þetta varðar.“

Aðspurð um hvort komið hafi upp tilfelli þar sem börnum eða kennurum hafi verið ógnað með hníf vill Amanda ekki tjá sig um það en segir að upp hafi komið misalvarleg atvik.

„Tilvikin eru auðvitað bara mismunandi. Við getum ekki tjáð okkur um einstaka tilvik en við teljum þó ástæðu til að skerpa á þessu og að foreldrar taki líka samtalið við börnin sín.“