Gos­móðan ekki á förum í bráð

Eins og fram hefur komið hefur grá slikja legið yfir höfuðborginni í dag en gosmóða frá eldgosinu á Reykjanesi er suðvestanlands og á Suðurlandi með tilheyrandi mengun. Helga Ívarsdóttir, veðurfræðingur, segir að ekki séu breytingar á veðri og vindátt í kortunum fyrr en á þriðjudag.

„Næstu daga er hæg breytileg átt á landinu og því má búast við áframhaldandi gosmengun víða á suður og vesturlandi. Gosmengunin sem er núna yfir Reykjavík er í raun og veru gosmóða þar sem SO2 hefur breyst í SO4 en einnig er SO2 búið að mælast og það má búast við áframhaldandi mengun á meðan það er svona hægur vindur,“ segir Helga.

„Það er ekki fyrr en á þriðjudag sem er búist við vaxandi suðaustanátt með rigningu og þá ættu nú aðeins að lagast hjá okkur loftgæðin.“

Ef rignir þá verður regnið súrt

Þorsteinn Jóhannsson, loftgæðasérfræðingur hjá Umhverfisstofnun, ræddi gosmóðuna í kvöldfréttum Stöðvar 2. Hann segir um að ræða gas sem hafi borist suður á haf síðustu dag en síðan yfir höfuðborgarsvæðið þegar vindáttin breyttist.

„Á þessum tíma er gasið búið að hvarfast og þá verður til SO4, sem eru agnir. Þetta er örfínt brennisteinsryk og mælist ekki á gasmælum. Fyrir flest heilbrigt fólk skiptir þetta litlu máli. Þetta er ekki endilega besti dagurinn til að hlaupa tíu kílómetra samt.“

Þorsteinn segir að fólk sem er viðkvæmt fyrir, með asma eða lungnasjúkdóma, geti fundið vel fyrir slíkri mengun. Þeir einstaklingar þurfi að huga að sínum lyfjum, mögulega taka meira af þeim í samráði við lækna og hafa hægt um sig.

Við ræddum við veðurfræðing sem sagði vindáttina geta haldist. En hvað ef það fer að rigna, hefur það einhver áhrif?

„Ef það fer að rigna þá rignir þetta niður. Þá fáum við kannski smá súrt regn. Ef það gerist einu sinni þá skiptir það ekki máli. Það sýndi sig í tveimur síðustu gosum, að þá rigndi svolítið, það hafði engin áhrif á vatnsból svo hægt væri að sjá.“

Verði mengunin hinsvegar viðvarandi geti slíkt regn farið að hafa áhrif á lífríkið. Enn sem komið er hafi það þó lítil áhrif og segir Þorsteinn ekki tilefni til þess að hafa áhyggjur.

Almennar ráðleggingar varðandi gasmengun eru eftirfarandi:

• Lungna og hjartasjúklingar hafi sín lyf tiltæk
• Andið sem mest með nefi og forðast líkamlega áreynslu utandyra í mikill mengun því það dregur úr þeim styrk sem kemst niður í lungu.
• Dvöl innanhúss með lokaða glugga og slökkt á loftræstingu veitir verulega vörn fyrir menguninni.
• Athugið að rykgrímur veita enga vörn gegn gasmengun
• Ráðstafanir til varnar SO2 og annarri gosmengun mengun innandyra
• Lokaðu gluggum og minnkaðu umgengni um útidyr.
• Hækkaðu hitastigið í húsinu.
• Loftaðu út um leið og loftgæði batna utandyra.