Kæru­nefnd út­boðs­mála gefur grænt ljós á Arnar­nes­veg

„Við erum að semja við Suður­verk og Loftorku um Arn­ar­nes­veg­inn, erum að bíða eft­ir gögn­um, en klár­um samn­ing­inn vænt­an­lega í næstu viku,“ hefur Morgunblaðið eftir G. Pét­ri Matth­ías­syni, upp­lýs­inga­full­trúa Vega­gerðar­inn­ar, um stöðu málsins.

Ákvörðun Vegagerðarinnar um að ganga til samninga við Suðurverk og Loftorku var kærð af Óskataki ehf. og Háfelli ehf., sem buðu sameiginlega í verkið og áttu lægsta tilboðið. Tilboð þeirra nam 5,4 milljörðum króna, um 88 prósent af áætlun Vegagerðarinnar.

Tilboðið var hins vegar ekki talið standast þær kröfur sem gerðar voru til tilboðsgjafa í útboðinu, þar sem samanlögð velta fyrirtækjanna tveggja nam aðeins 1,8 milljörðum en gerð var krafa um veltu upp á 2,2 milljarða. 

Óskatak og Háfell töldu að verðbæta ætti upphæðina en kærunefndin komst að þeirri niðurstöðu að ef svo hefði verið hefði verið kveðið sérstaklega á um það í útboðslýsingunni og nánari útfærsla tilgreind.

Tilboð Suðurverks og Loftorku var 1,3 milljörðum hærra en lægsta tilboðið.

Að sögn G. Péturs munu tafirnar vegna kærunnar ekki verða til þess að fresta áætluðum verklokum.