Ekkert grín að ætla að safna 36 milljónum

„Ég var í maganum á mömmu þegar ég kom fyrst í Vatnaskóg. Hún vann þá í eldhúsinu. Síðan hef ég komið mjög oft og var í flokki á hverju ári frá níu ára aldri en hef sömuleiðis starfað þar töluvert mikið sem sjálfboðaliði,“ segir Nói Pétur í samtali við blaðakonu. 

„Vatnaskógur er mér afar kær og hefur haft gríðarleg áhrif á mig.“

Í tilefni afmælisins sá Nói Pétur, 17 ára nemi við Verzlunarskóla Íslands, sér leik á borði og setti á stofn söfnun til styrktar sumarbúðunum. Markmið hans er að safna rúmlega 36 milljón krónum. 

„Ég skipti þessu í fjóra flokka, segir Nói Pétur og heldur áfram. „Annars vegar söfnun á matskálanum, svokölluðum Stínusjóði, söfnun til styrktar kvikmynd um hundrað ára sögu búðanna og að lokum til styrktar viðhaldi á staðnum.“

Safna 1.000 krónum fyrir hvern dag í sögu Vatnaskógar

Spurður hvernig svo stórtæk hugmynd hafi orðið til segir Nói Pétur hana hafa orðið til í samtali við föður sinn, Guðna Má Harðarson, en hann starfar sem prestur við Lindakirkju ásamt því að hafa getið sér góðs orðs innan barnastarfs kirkjunnar.

„Við pabbi vorum að ræða hvort það þyrfti ekki að gera eitthvað fyrir Vatnaskóg í tilefni tímamótanna. Það væru ýmislegir hlutir sem að Skógarmenn vildu gera á afmælinu og að það þyrfti að finna góða leið til að safna pening fyrir því.

Stuttu síðar kom pabbi með þessa hugmynd: Að safna 1.000 krónum fyrir hvern dag í sögu Vatnaskógar.

 Þar með fæddist þessi hugmynd. Verkefnið er ansi stórt enda ekkert grín að ætla sér að safna 36 og hálfri milljón.“

Nói Pétur ítrekar þó að þetta sé ekki í fyrsta sinn sem Skógarmönnum, eins og sjálfboðaliðar Vatnaskógar kalla sig, láti sig dreyma stórt. „Þegar mér finnst þetta kannski vera of hátt markmið hugsa ég til sögu staðarins. 

Er þetta eitthvað óraunsærra en að stofna sumarbúðir á stað þar sem enginn vegur nær til á tíma þar sem það var ekki einu sinni til íslensk útvarpsstöð? Að byggja skála í sumarbúðunum við mikinn vöruskort í miðri heimsstyrjöld? 

Jafnvel þó mér finnist ég stundum vera kominn út í of stórt verkefni þá hef ég fundið fyrir miklum stuðningi frá ýmsu fólki sem hefur jafn mikla ást á staðnum og ég. Þegar að ég kynnti söfnunina fyrir Skógarmönnum fékk ég strax hlýjar kveðjur. Margir gáfu strax eitthvað eða komu með hugmyndir fyrir söfnunina. Nú þegar erum við búin að safna fyrir fyrsta árinu og vel yfir það.

Rekið af hugsjónum fyrir æsku landsins

Pælingin er að hver sá sem vill segja sína sögu, eða einfaldlega leggja málefninu lið, og velji hvaða málstaði innan félagsins hann vilji styrkja og leggi 1.000 krónur inn á söfnunarsíðuna sem ég hef nú stofnað. Félagið er rekið af hugsjónum fyrir æsku landsins en starfið nýtur mikillar virðingar og er alls ekki hagnaðardrifið. 

Í mínum huga er Vatnaskógur sannkallað ævintýraland sem býður börnum og unglingum tækfæri til að rækta allt í senn líkama, sál og anda. 

Markmiðið er að börn finni að þau skipti máli og geti ræktað hæfileika sína á skemmtilegan hátt, um leið og þau efla trúarvitund og félagsþroska í fallegri náttúru.“

Treystum á góðmennsku og sjálfboðavinnu

Nói Pétur bætir við að hundruð sjálfboðaliða leggi starfinu lið og því margfaldist hver króna sem rennur til starfsins. „Frábært dæmi er heimasíðan sem er unnin af sjálfboðaliðum. Mér finnst svo mikilvægt að komandi kynslóðir stefni að því að bæta starf Vatnaskógar, byggja upp og miðla boðskap sem eftir einstaklinga til góðs. Til þess treystum við á góðmennsku fólks og sjálfboðavinnu.“

Hundruðir barna heimsækja búðirnar á sumri hverju. Það gefur því augaleið að frásagnirnar séu fjölbreyttar og vonandi í flestum tilfellum gleðilegar. „Söfnunin er víðtæk og er markmið okkar að ná til allra landsmanna sem hafa komið í Vatnaskóg eða sent börnin sín þangað. 

Við köllum á fyrirtæki, einstaklinga og félög til að styrkja okkur. Það er hægt að gera á vefsíðunni okkar, vatnaskogur100.is. Við erum einnig með fjáraflanir eins og línuhappdrætti og svo verður einnig áheitasöfnun fyrir endurgerð fyrstu ferðarinnar í Vatnaskóg, en þá var gengið úr Mosfellssveit og í sumarbúðirnar en sú ferð tekur einn og hálfan dag,“ segir Nói Pétur að lokum. 

Áhugasamir eru að sjálfsögðu hvattir til þess að leggja málefninu lið.