Mann­dráp og stór­fellt fíkni­efna­smygl: Staðan á málunum

Rannsókn á þremur manndrápsmálum sem komið hafa upp á höfuðborgarsvæðinu síðustu vikur miðar vel að sögn yfirmanns miðlægrar rannsóknardeildar. Aðstæðurnar væru þó sannarlega óvenjulegar.

„Jú það er ekki hægt að segja annað. Það er sjaldgæft að vera með þrjú slík mál til rannsóknar, ég man hreinlega ekki eftir því,“ segir Grímur Grímsson, yfirmaður miðlægrar rannsóknardeildar lögreglunnar á höfuðborgarsvæðinu.“

„Þetta er mikið álag og staðreyndin er að sú eining sem tekst á við þessi alvarlegu líkamsárásarmál og manndrápsmál telur ekki nema fimm manns. Og svo eru sumarfrí.“

Rannsókn lokið á Fjarðarkaupsmálinu

Fjögur ungmenni voru handtekin í tengslum við dauða manns frá Pólland eftir átök á bílastæði við Fjarðarkaup í Hafnarfirði hinn 20.apríl. Maðurinn var stunginn til bana.

Þeirri rannsókn er lokið.

„Málið er komið til héraðssaksóknara sem leggur mat á rannsóknina og tekur ákvörðun um hvort gefin verður út ákæra,“ segir Grímur.

Fjögur ungmenni voru handtekinn í tengslum við málið, þrír drengir og stúlka á unglingsaldri. Drengirnir, sem eru á aldrinum 17-19 ára hafa setið í gæsluvarðhaldi frá því að málið kom upp en stúlkunni var sleppt úr haldi. Grímur segir að hún hafi þó enn réttarstöðu grunaðs í málinu.

Stunginn til bana af meðleigjanda sínum

Á þjóðhátíðardaginn 17. júní var annar pólskur karlmaður stunginn til bana við Drangarhraun. Meðleigjandi hans er grunaður um verknaðinn.

„Við teljum okkur vera með nokkuð ljósa mynd af því hvað gerðist, einn maður situr í gæsluvarðhaldi og hefur gert frá því að málið kom upp,“ segir Grímur varðandi stöðuna á því máli.

Bráðabirgðaniðurstaða krufningar liggur fyrir sem leiddi í ljós að stunga var banamein mannsins. Grímur segir að hnífur sem notaður var til verknaðarins hafi fundist á vettvangi. 

Annar maður sem einnig var handtekinn þegar málið kom fyrst upp en var fljótlega sleppt, hefur ekki stöðu sakbornings.

Lést eftir eitt höfuðhögg

Þá kom upp manndrápsmál á skemmtistaðnum LÚX í Austurstræti fyrir tæpum tveimur vikum. Litáískur maður á þrítugsaldri lést eftir átök við íslenskan mann á sama aldri. 

„Bráðabirgðaniðurstaða úr krufningu liggur fyrir, sú niðurstaða leiðir í ljós að hann lést af völdum höfuðhöggs,“ segir Grímur.

Höfuðhöggs í eintölu?

„Já.“

Grímur segir mál af þessu tagi, þar sem maður deyr eftir aðeins eitt högg mjög sjaldgæf. Í fljótu bragði muni hann eftir tveimur málum sem komu upp með tiltölulega skömmu millibili fyrir nærri því 20 árum.

Ekki sé hægt að segja til um hvort um ásetning hafi verið að ræða. 

„En ég ítreka það sem hefur komið fram í tilkynning, að við teljum ekki að það sé ástæða til að halda þeim sem grunaður er um þennan verknað í gæsluvarðhaldi.“

Grænlendingar og Dani grunaðir um stórfellt fíkniefnasmygl

Þá er stórfellt fíkniefnasmygl til rannsóknar. Nýlega voru þrír menn handteknir grunaðir um að ætla að smygla miklu magni fíkniefna til landsins í skútu.

Tveir mannana eru grænlenskir og einn danskur. Sá elsti er fæddur árið 1970 og sá yngsti árið 2002.

Grímur vill lítið gefa upp um málið, líkt og um hvaða efni ræðir og hversu mikið magn en samkvæmt heimildum fréttastofu er um hass að ræða.  Ákvörðun um áframhaldandi gæsluvarðhald yfir mönnunum verður tekin í fyrramálið. 

Grímur segir enga Íslendinga tengjast málinu sem sé rannsakað í samstarfi við dönsk lögregluyfirvöld.