Vilja að pólitísk á­byrgð í Ís­lands­banka­málinu sé skoðuð betur

Hanna Katrín Friðriksson, þingflokksformaður flokksins, segir flokkinn leita til forsætisráðherra fyrst en verði hún ekki við því geti meirihluti þings kallað eftir því að þing komi saman. Forsætisráðherra sagði að loknum fundi ráðherranefndar að hún sjái enga ástæðu til að kalla þing saman. 

„Við teljum að þessi skýrsla, niðurstaða Fjármálaeftirlitsins, sem sýnir alvarlegt lögbrot við sölu á hlut ríkisins í Íslandsbanka kalli á það að upphafleg beiðni stjórnarandstöðunnar um sérstaka rannsóknarnefnd til að fara ofan í saumana á þessu máli, verði sett á laggirnar núna.“

Hanna segir stjórnvöldum hafa mistekist að gæta að hagsmunum almennings í þessu máli og að þótt svo að tvær skýrslur séu komnar um málið, frá Ríkisendurskoðun og Fjármálaeftirlitinu, taki þær báðar til afmarkaðs hluta sölunnar.

„Við þurfum að klára þessa athugun núna með því að líta til hinnar pólitísku ábyrgðar og skoða aðkomu stjórnvalda og fjármálaráðherra, handhafa eignarinnar, áður en við getum sett punktinn fyrir aftan þetta leiðindamál.“

Í áfalli yfir þessu máli

Spurð hvort hún telji meira eiga eftir að koma fram þar segir Hanna Katrín að hún geti ekkert fullyrt um það en að það sem alvarlegra sé að hún geti ekki fullyrt að svo sé ekki. Það vanti púsl í myndina og að aftur sé komin staðfesting á því, með skýrslu Fjármálaeftirlitsins núna.

„Ég man ekki betur en að stjórnvöld hafi verið fyrir örfáum mánuðum síðan mjög einurð í þeirri skoðun sinni og fullyrðingu að engin lög hafi verið brotin við þessa framkvæmd. Það hefur aldeilis annað komið á daginn,“ segir Hanna og að full ástæða sé til að rannsaka það frekar.

„Ég er ein af þeim sem er, ja, bara í áfalli yfir þessu. Ekki síst með skírskotun í það sem gekk yfir íslenska þjóð fyrir um einum og hálfum áratug síðan. Við verðum að taka af allan vafa um það hvernig þetta ferli átti sér stað ef við ætlum að draga einhvern lærdóm af þessu núna.“

 Formenn stjórnarflokkanna þriggja ræddu málið í Pallborðinu á Vísi í morgun þar sem kom fram sterk krafa frá öllum þremur ráðherrum um að stjórnendur bankans þurfi að axla ábyrgð.

Spurð um viðbrögð við Pallborðinu á Vísi í morgun segir Hanna að henni hafi heyrst formennirnir samtaka í sínum svörum og að málinu verði lokið með því að kalla til hluthafafundar og stjórnendur til ábyrgðar.

„En ég vil kannski minna á það að það er ekkert sem heitir annað hvort eða þar. Það er ekki annað hvort stjórnendur bankans eða pólitíkin. Það er mjög eðlilegt að það sé í minnsta kosti skoðað hvort það séu ekki báðir aðilar,“ segir Hanna og að málinu sé ekki endilega lokið með því að kalla stjórnendur bankans til ábyrgðar.

Það sé mögulega meira þarna en að við munum ekki vita það nema að ítarleg rannsóknarskýrsla sé gerð.

„Mér finnst svakalega bratt að ganga út frá því að svo sé ekki, sérstaklega í ljósi þess að það sem var gengið út frá með aðkomu bankans, það hefur heldur betur ekki staðist. Ég skil ekki á hvaða forsendum menn gefa sér að allt annað hafi verið í lagi.“

Þetta kannski skiptir líka máli fyrir íslensku þjóðina, að fá þetta allt á yfirborðið?

„Ég myndi aldeilis ætla það ef einhver þarf á því að halda þá er það íslensk þjóð sem þarf á því að halda. Eftir þær hremmingar sem hún gekk í gegnum fyrir ekki svo löngu síðan.“

Boðað verður til hluthafafundar hjá bankanum í vikunni. Samkvæmt svörum frá bankanum liggur dagsetning fundarins ekki fyrir fyrr en boðað er til fundar. Fréttastofa leitaði eftir viðbrögðum frá bankastjóra vegna málsins en hún afþakkaði beiðnina, eins og í gær.

Fréttin hefur verið uppfærð með viðbrögðum forsætisráðherra. Uppfærð 27.6.2023 klukkan 13:19.