Aldrei fleiri greinst með lekanda

Frá þessu er greint í Farsóttafréttum embættis landlæknis.

Af þeim 159 tilfellum sem greindust í fyrra greindust 70 prósent hjá körlum og 30 prósent hjá konum. Kynjahlutfallið hefur sveiflast milli ára. Undanfarin fimm ár hafa flestir greindra verið í aldurshópnum 25 til 34 ára, nema árið 2020 þegar flestir voru á aldrinum 15 til 24 ára.

„Fjölgun tilfella lekanda á árinu 2022 hefur einnig sést í öðrum löndum Evrópu. Í Noregi varð aukning tilfella hjá gagnkynhneigðu yngra fólki. Sérstakar áhyggjur eru þar í landi af aukningu lekandasmita hjá ungum konum þar sem lekandi getur valdið svæsnum sýkingum og ófrjósemi hjá konum. Ekki hafa komið fram ákveðnar skýringar á þessari aukningu en ein af hugsanlegum skýringum sem sóttvarnarstofnun Noregs (Folkehelseinstituttet) hefur sett fram á þessari fjölgun lekandasmita er opnun samfélagsins á ný eftir COVID-19 heimsfaraldurinn,“ segir í Farsóttafréttum. 

Þá segir að vaxandi áhyggjur séu af sýklalyfjaónæmum lekandabakteríum.