Ari Eldjárn og Tinna í Hrím nýtt par

Ari og Tinna hafa verið að stinga saman nefjum í nokkurn tíma og má með sanni segja að þau séu eitt glæsilegasta par landsins. Reikna má með því að glatt sé á hjalla hjá parinu en þau hafa meðal annars sést skella upp úr saman á uppistandi Jakobs Birgissonar.

Ari hefur getið gott orð af sér sem uppistandari frá árinu 2009. Framan af kom hann fram með uppistandshópnum Mið-Íslandi en fjölmörg brot úr samnefndu sjónarpsþáttum hópsins má einmitt finna á Vísi.

Undanfarin ár hefur Áramótskop Ara orðið að föstum lið hjá mörgum Íslendingnum í kringum áramótin. Grínistinn hefur selt upp hvert Háskólabíóið á fætur öðru undanfarin ár. Auk þess hefur Ari verið á heljarinnar flakki úti í heim með uppistand sitt og er reglulegur gestur á árshátíðum og veislum.

Þá hefur sýningin Pardon my Icelandic verið aðgengileg Netflix-notendum í 190 löndum.

Tinna hefur verið í fyrirtækja- og verslunarrekstri síðastliðin tíu ár og er með BA gráðu í arkitektúr. Tinna greindi frá því hvað hún kynni að meta í fari karlmanna í liðnum Bónorðin á Vísi fyrir tveimur árum. Þar bar tónlist meðal annars á góma. Ari er einmitt trommari svo þar er strax komið áhugamál sem parið deilir.

Bæði eiga þau tvö börn úr fyrri samböndum.