Aðgerðum lokið án handtöku

Þetta kemur fram í tilkynningu frá lögreglunni á Norðurlandi vestra á Facebook. Lögregluembættið hefur ekki viljað tjá sig við fjölmiðla vegna málsins en harmar nú fréttaflutning af málinu.

Greint var frá því í kvöld að lögregla hafi ráðist í nokkuð umfangsmiklar lögregluaðgerðir í íbúagötu á Sauðárkróki. Gunnar Hörður Garðarsson samskiptastjóri ríkislögreglustjóra staðfesti í samtali við fréttastofu að sérsveit hafi verið send til Sauðárkróks en hún hafi að öðru leyti ekki komið að málinu. 

RÚV greindi fyrst frá aðgerðum lögreglu. Í frétt RÚV kom fram að grunur væri um að vopnaður maður væri þar innanhúss í götunni og að sögn sjónarvotta væri um nokkurs konar umsátursástand að ræða. Þetta vildi Birgir Jónasson lögreglustjóri hins vegar ekki staðfesta en hann vildi raunar lítið sem ekkert tjá sig við fréttastofu. Vísaði hann til þess að lögregla myndi síðar í kvöld senda frá sér tilkynningu:

„Um miðjan dag í dag, 8. febrúar, bárust lögreglunni á Norðurlandi vestra upplýsingar sem gáfu tilefni til að lögregla greip til aðgerða á Sauðárkróki til að tryggja allsherjarreglu. Við þær aðgerðir naut embættið aðstoðar embættis ríkislögreglustjóra og lögreglunnar á höfuðborgarsvæðinu,“ segir í tilkynningu lögreglu. Enginn hafi verið handtekinn og ekki sé grunur um refsiverða háttsemi.

„Að gefnu tilefni skal tekið fram að ekki var um „umsátur“ að ræða og harmar embættið slíkan fréttaflutning. Lögreglan á Norðurlandi vestra mun ekki upplýsa frekar um málið vegna eðlis þess og viðkvæmni,“ segir í lok tilkynningar.