Með Tví­höfða á tví­höfðunum

Húðflúr sem fólk fær sér saman eða svokölluð paratattú hafa alltaf notið ákveðinna vinsælda þrátt fyrir að í eðli sínu geti þau verið nokkuð varasöm ef fólk síðan skilur að skiptum. Enda er ákvörðun um að fá sér húðflúr nokkuð endanleg ef svo má segja.

Þau Sigmar og Inga fóru ótroðnar slóðir þegar þau fengu sér flúr saman en hugmyndin kviknaði fyrir um hálfu ári.

„Við náttúrulega erum búin að vera að hlusta á tvíhöfða saman, hlustuðum í raun á hverju kvöldi mjög reglulega og þetta var orðinn svona vani. Við hlustuðum alltaf áður en við fórum að sofa. Svo bara einn daginn þá kemur Inga með þá hugmynd segir bara við verðum að fá okkur Tvíhöfðatattú. Og þá byrjuðum við að pæla í þessu,“ segir Sigmar Freyr Jónsson.

„Þetta á bara einhvernveginn svo vel við okkur. Mér fannst þetta bara rétt. Þetta á bara að vera svona. Og þetta var ekkert endilega af því að við erum par, við erum búin að vera vinir svo ógeðslega lengi þannig að það fittaði einhvernvegin inn í þetta líka,“ segir Sigríður Ingibjörg Jónsdóttir. 

En hvers vegna er Inga með Sigurjón á upphandleggnum en Sigmar með Jón Gnarr?

„Já hann er bara Jón og ég er Sigurjón,“ segir Inga.

 „Ég svona tengi meira við Jón, maður á það til að festast í gríni og svona,“ segir Sigmar. 

Spennt fyrir áframhaldandi gríni

Þeir félagar Jón og Sigurjón eru að fara að halda áfram Tvíhöfðavegferðinni en núna hjá Tal, sem er hlaðvarpsveita í eigu Sýnar. En hvernig líst Sigmari og Ingu á það?

„Við erum bara ótrúlega ánægð með það. Þetta eru ótrúlegar fréttir. Bara geggjað. Mér finnst það alger snilld að þeir séu að fara af stað með sitt svona eigið. Fá að ráða sér sjálfir. Þetta er bara geggjað.“

„Okkur finnst mjög gott að sofna við þá á kvöldin, mjög kósí,“ segir Inga.

Dreymir ykkur þá á nóttunni fyrst þið sofnið við þá á kvöldin?

„Nei það hefur ekki komið fyrir og miðað við hvað mann dreymir mikið af rugli þá hefur Tvíhöfði aldrei komið inn í draumana,“ segir Sigmar að lokum.