Frábær fyrri hálfleikur hjá strákunum í flottum sigri á Dönum

Eftir jafntefli á móti Svíum og eins marks sigur á Norðmönnum var eiginlega aldrei spurning um hvernig leikurinn færi í morgun. Það var aðallega stórkostlegur fyrri hálfleikur sem sá til þess.

Valsmaðurinn Benedikt Gunnar Óskarsson var markahæstur í íslenska liðinu með sex mörk en þar af voru fjögur mörk úr vítum. Mosfellingurinn Þorsteinn Leó Gunnarsson skoraði fimm mörk og Andri Már Rúnarsson, sem spilar sem atvinnumaður hjá Stuttgart skoraði fjögur mörk.

Haukastrákarnir Kristófer Máni Jónasson og Guðmundur Bragi Ástþórsson skoruðu báðir þrjú mörk, Selfyssingurinn Tryggvi Þórisson skoraði einnig þrjú mörk og Símon Michael Guðjónsson hjá HK var með tvö mörk.

Selfyssingurinn Jón Þórarinn Þorsteinsson varði níu skot í fyrri hálfleik en ekkert í þeim síðari og þá vörðu markverðir íslenska liðsins aðeins eitt skot allan hálfleikinn samkvæmt tölfræði norska sambandsins.

Mótið er hluti af undirbúningi undir lokakeppni Evrópumóts U-20 sem byrjar 7. Júlí næstkomandi í Porto í Portúgal.

Íslensku strákarnir skoruðu tuttugu mörk í fyrri hálfleiknum og leiddu með níu mörkum eftir hann, 20-11.

Íslenska liðið skoraði fyrsta mark seinni hálfleiksins og komst því tíu mörkum yfir en svo náðu Danir að minnka muninn í fjögur mörk á fyrstu níu mínútum hálfleiksins.

Þjálfararnir Einar Andri Einarsson og Róbert Gunnarsson tóku leikhlé í stöðunni 23-19.

Íslenska liðið náði aftur sex marka forskoti en Danir héldu síðan áfram að vinna upp muninn sem fór niður í þrjú mörk. Íslensku strákunum tókst hins vegar að komast í gegnum storminn og unnu að lokum sannfærandi sigur.

Sigurinn þýðir að íslensku strákarnir verða Norðurlandameistarar ef Svíar vinna ekki stærra en þriggja marka sigur á Noregi seinna í dag.

Norðmenn töpuðu hins vegar með fjórtán marka mun á móti Dönum en bara með einu marki á móti Íslandi í gær.