Icelandair hyggst bæta við sig fjórum Boeing 737 MAX þotum

Þetta kemur fram í tilkynningu félagsins til kauphallar og fjölmiðla. Bogi Nils Bogason, forstjóri Icelandair, segir ánægjulegt að félagið sé bæta við Boeing 737 MAX vélum sem það hafi tryggt sér á góðum kjörum.

„Þær eru af nýrri kynslóð umhverfisvænni flugvéla og því mikilvægur þáttur í að draga úr kolefnislosun í starfsemi okkar. Við höfum aukið starfsemina jafnt og þétt eftir heimsfaraldurinn og höldum nú úti mjög öflugu leiðakerfi sem tengir Evrópu og Norður-Ameríku í gegnum Ísland.“

Icelandair fljúgi beint til 44 áfangastaða erlendis í sumar, allt að fimm sinnum á dag.

„Þessi viðbót við flotann gefur okkur tækifæri til þess að auka þjónustuna enn frekar með því að bæta við áfangastöðum og auka tíðnina á þá staði sem við fljúgum til nú þegar,“ segir Bogi Nils í tilkynningu.