Ísak Berg­mann á lista með Pedri, Ansu Fati, Cama­vinga, Belling­ham og fleiri góðum

Listinn er að þessu sinni mestmegnis byggður upp á leikmönnum sem fæddir eru árið 2002 eða 2003 þó svo að eitt og eitt 2004 módel leynist hér og þar. Hægt er að kjósa á vef Tuttosport og þegar fréttin er skrifuð hafa tæplega 300 þúsund atkvæði borist.

Ísak Bergmann hefur vakið mikla athygli undanfarin misseri. Hann varð lykilmaður hjá sænska liðinu Norrköping ungur að aldri og var svo keyptur á fúlgur fjár til Kaupmannahafnar.

Þó Ísak Bergmann hafi átt nokkuð erfitt uppdráttar snemma árs 2022 þá kom hann sterkur inn undir lok tímabils og var í stóru hlutverki er FCK tryggði sér titilinn. Þá hefur þessi ungi leikmaður spilað 13 A-landsleiki og skorað í þeim 1 mark.

Ásamt Ísaki Bergmanni má finna fjölda frábærra leikmanna á listanum. Til að mynda Pedri, Gavi og Ansu-Fati frá Barcelona en alls eiga Börsungar fimm leikmenn á listanum.

Evrópu- og Spánarmeistarinn Eduardo Camavinga [Real Madríd], Þýskalandsmeistarinn Jamal Musiala [Bayern München], Jude Bellingham [Borussia Dotmund], Anthony Elanga [Manchester United] og Harvey Elliott (Liverpool) eru allir meðal þeirra sem eru tilnefndir til verðlaunanna.

Fyrrum Gulldrengir eru til að mynda Lionel Messi, Raheem Sterling, Kylian Mbappé, Erling Braut Håland og Wayne Rooney.