Segir viðbúið að fleiri greinist en óttast ekki sprengingu

Fyrstu tveir einstaklingarnir greindust þann 8. júní og um helgina greindist þriðji einstaklingurinn. Um er að ræða karlmenn sem höfðu verið á ferðalagi um Evrópu en engin tengsl eru þó á milli þess sem greindist um helgina og þeirra sem greindust í síðustu viku.

„Þetta er bara svona eins og við bjuggumst við, ég á svo sem ekki von á neinni sprengju en við verðum að sjá hvað gerist,“ segir Þórólfur Guðnason sóttvarnalæknir aðspurður um stöðu mála.

Mennirnir eru ekki alvarlega veikir að sögn Þórólfs og telur hann ólíklegt að þeir verði það, þó að það geti tekið nokkrar vikur fyrir sýkinguna til að ganga sitt skeið. Enn sem komið er hefur enginn verið sendur í smitgát út frá tilfellunum, þar sem smitrakning sýndi ekki fram á sérstaklega náin tengsl við neinn.

„Það er lagt mat á hversu mikil útsetning hefur verið og hvort að það þurfi að setja fólk í smitgát, en samgangurinn þarf að vera töluvert mikill til þess að það sé gert,“ segir Þórólfur.

Þó að hann geri ekki ráð fyrir útbreiddum faraldri segir Þórólfur viðbúið að fleiri tilfelli komi upp á næstunni, helst hjá einstaklingum sem hafa tengsl við útlönd og þá aðallega Evrópu, en erfitt er að spá fyrir um það.

„Ég held að við verðum bara að sjá og áfram að hvetja fólk sem er með einkenni, blöðrur á húð og sérstaklega blöðrur á kynfærum, og kannski fólk sem hefur líka verið erlendis og í skyndikynnum þar, að endilega gera vart við sig og fá greiningu,“ segir Þórólfur.

Binda vonir við niðurstöður frá Svíþjóð í vikunni

Eftir að fyrstu tvö tilfellin greindust hér á landi með skyndi- og PCR prófi var ákveðið að senda þau til Svíþjóðar til að staðfesta án alls vafa að um apabólusmit væri að ræða. Guðrún Svanborg Hauksdóttir, yfirlæknir sýkla- og veirufræðideildar Landspítala, segir þær niðurstöður ekki enn liggja fyrir.

„Af því að þetta er veira sem er flokkuð í hópi með sýkingavöldum sem að geta verið mikilvægar í hernaði þá eru alveg ótrúlega strangar reglur og mikil pappírsvinna í kringum allar sendingar á sýnum, þannig þetta er ekki enn þá farið út frá okkur,“ segir Guðrún.

Vonandi verði þó hægt að senda sýnin út í dag og niðurstaða því mögulega legið fyrir á næstu dögum, mögulega fyrir helgi. Ef þau sýni reynast jákvæð er ólíklegt að þriðja sýnið verði sent út.

„Við kannski bara metum það bara svolítið þegar þar að kemur. En af því að ef það eru dæmigerð einkenni, hraðprófið er jákvætt og PCR prófið er jákvætt, þá er þetta nokkuð öruggt,“ segir Guðrún.

Verið er að þróa PCR sýnin hér á landi frekar en hægt er að fá niðurstöðu hér á landi innan nokkurra klukkustunda. Guðrún segir þau treysta sínum aðferðum nokkuð vel og gætu þau tekið við nokkrum fjölda sýna daglega. Hún á þó ekki von á því að sýnafjöldinn verði mikill, hvað þá í samanburði við Covid.

„Þetta er svo miklu minna smitandi og það hefur svo mikið að segja að fólk passar sig. Þannig það er líklegt að það komi eitt og eitt tilfelli en það er mjög ólíklegt að þetta verði einhver faraldur innanlands,“ segir Guðrún.

„Við höfum ekki áhyggjur af því að við eigum ekki eftir að ráða við að greina öll sýnin sem berast.“