Um­fjöllun, við­töl og myndir: Breiða­blik-Sel­­foss 1-0 | Heima­liðið upp fyrir gestina í töflunni

Breiðablik vann Selfoss 1-0 í lokuðum leik. Bæði lið sköpuðu sér lítið af færum en Breiðablik var sterkari aðilinn og átti sigurinn skilið. Með sigri komst Breiðablik upp fyrir Selfoss i töflunni. 

Leikurinn fór rólega af stað fyrstu fimm mínúturnar en næstu tuttugu mínúturnar spilaði Breiðablik bara á vallarhelmingi gestanna.

Selfoss átti í miklum vandræðum með að losa pressu Breiðabliks og voru heimakonur mikið með boltann á síðasta þriðjungi vallarins. Þrátt fyrir mikla yfirburða Blika voru færin af skornum skammti og komu bestu sóknir heimakvenna upp úr hornspyrnum.

Það dró til tíðinda á 29. mínútu þegar Hildur Antonsdóttir kom Breiðabliki yfir. Taylor Marie Ziemer vippaði boltanum milli varnarlínu Selfoss þar sem Hildur stakk sér inn og þrumaði boltanum í netið.

Gestirnir vöknuðu aðeins við mark Breiðabliks og fóru að sækja af fullum þunga. Miranda Nild fékk besta færi Selfoss í fyrri hálfleik en Telma Ívarsdóttir, markmaður Breiðabliks, varði ' hnitmiðað skot hennar.

Þegar flautað var til hálfleiks var Breiðablik einu marki yfir.

Það mætti halda að um endurtekið efni hafi verið að ræða í byrjun síðari hálfleiks. Breiðablik byrjaði síðari hálfleik nákvæmlega eins og þann fyrri. Selfoss komst ekki yfir miðju og fékk Breiðablik margar góðar stöður á vellinum en heimakonur nýttu þær illa.

Þegar leið á síðari hálfleik komst leikurinn í meira jafnvægi. Selfoss fór að halda betur í boltann og spila betur úr pressu en skapaði sér engin færi.

Hildur Antonsdóttir var nálægt því að gera sitt annað mark á 72. mínútu eftir góðan undirbúning frá Áslaugu Mundu sem renndi boltanum á Hildi en skot hennar framhjá.

Seinni hálfleikur var mjög lokaður og sköpuðu liðin lítið sem ekkert af færum. Báðir þjálfararnir reyndu að koma með ferskar lappir af bekknum en það breytti litlu í gang leiksins. Breiðablik vann á endanum 1-0.

Af hverju vann Breiðablik?

Breiðablik hélt boltanum betur og skapaði sér fleiri hættuleg færi. Þrátt fyrir að Breiðablik hafi verið meira með boltann á vallarhelmingi Selfoss var leikurinn nokkuð lokaður. 

Hildur Antonsdóttir gerði laglegt mark í fyrri hálfleik sem reyndist vera sigurmark leiksins.

Hverjar stóðu upp úr?

Hildur Antonsdóttir var hættulegust í sóknarleik Breiðabliks. Hildur var búin að hóta marki skömmu áður en hún skoraði laglegt mark í fyrri hálfleik.

Natasha Moraa Anasi, leikmaður Breiðabliks, var öflug í vörninni og skallaði allar fyrirgjafir sem komu inn í teig Breiðabliks.

Hvað gekk illa?

Það gerðist lítið sem ekkert í sóknarleik Selfoss. Gestirnir áttu í miklum vandræðum með að skapa sér fær á síðasta þriðjungi.

Hvað gerist næst?

Selfoss fær Val í heimsókn á þriðjudaginn eftir viku klukkan 19:15.

Breiðablik fer á Þróttaravöll og mætir Þrótti næsta þriðjudag klukkan 20:15.

Björn: Ekki fallegasta markið hennar Hildar á ferlinum

Björn Sigurbjörnsson, þjálfari Selfoss, var svekktur með tap á Kópavogsvelli.

„Þetta var örugglega ekki fallegasta mark sem Hildur [Antonsdóttir] hefur skorað á ferlinum en mark engu að síður. Mér fannst við gera vel gegn best spilandi liði deildarinnar að mínu mati. Vinnuframlagið var gott en þurfum að vera beittari fram á við,“ sagði Björn í samtali við Vísi eftir leik.

Björn var ósáttur með hversu lengi hans lið var að venjast gervigrasinu á Kópavogsvelli.

„Undirlagið var ekki að hjálpa okkur. Boltinn rúllaði meira heldur en við erum vanar á grasinu á Selfossi. Við tókum allt of langan tíma í aðlagast því.“

„Mér fannst við oft flýta okkur of mikið. Við náðum góðum sóknum þar sem við gerðum vel í að spila boltanum og hefðum getað fengið góðar stöður en þá völdum við vitlaust.“

Birni fannst vanta upp á sóknarleik Selfoss þar sem hann hefði viljað sjá fleiri færi.

„Það vantaði meiri þolinmæði á síðasta þriðjungi. Við vorum of mikið að flýta okkur þegar við fengum góðar stöður á vellinum,“ sagði Björn Sigurbjörnsson að lokum.

Myndir