Valur endaði í 3. sæti Bestu deildarinnar með 44 stig, átján stigum á eftir Íslandsmeisturum Breiðabliks. Valsmenn fengu ellefu stigum minna en tímabilið 2023 þegar þeir lentu í 2. sæti.
Baldur segir að Valur gæti þurft að sýna þolinmæði í leit sinni að fyrsta Íslandsmeistaratitlinum síðan 2020.
„Þetta sýnir okkur að grunnurinn er alltaf sterkari en kaupstefnan. Að reyna að búa til sigurlið fyrir mót þegar þú ert ekki með grunninn sem Víkingur og Breiðablik hafa byggt upp síðustu 3-4 ár,“ sagði Baldur í Besta sætinu.
„Það er það sem Valur þarf að gera núna. Þeir munu ekki geta smíðað sigurlið einn, tveir og þrír með því að kaupa inn dýra leikmenn. Það er ekki þannig.“
Bilið rosalega breitt
Í byrjun ágúst var Arnari Grétarssyni sagt upp sem þjálfara Vals og við tók Srdjan Tufegdzic. Valsmenn unnu aðeins fjóra af tólf deildarleikjum undir stjórn Túfa.
„Þeir ætla að treysta á Túfa. Hvað gerir hann með liðið í vetur? Í hvaða átt fer hann með liðið? Breytist eitthvað frá því sem við sáum undir lok móts? Það er búið að tala um þennan Túfabolta. Ætla þeir að breyta eitthvað út af því?“ sagði Baldur.
„Það eru spennandi tímar framundan en mjög ærið verkefni fyrir Val því þeir eru svo rosalega langt á eftir Víkingi og Breiðabliki. Það kemur ekkert á óvart í ljósi þess hvað þarf til að velta þeim úr sessi. Þau eru svo langt, langt á undan öðrum liðum í dag.“
Túfa þarf trú
Hingað til hefur Túfa verið kenndur við vel skipulagðan varnarleik en þrátt fyrir það hélt Valur aldrei hreinu eftir að hann tók við.
„Við erum ekki að tala eitthvað niðrandi um Túfa sem þjálfara. Hann er góður þjálfari og væri ekki kominn í Val nema hann væri góður þjálfari. Hann er góður að „drilla“ lið og það fer mikil vinna í þetta, langar æfingar, og hann vill að liðið sitt sé í góðum takti og hafi skilning á sínum hlutverkum, fyrst og fremst í varnarleiknum,“ sagði Baldur.
„En leikmennirnir þurfa líka að vilja gera það. Þú getur verið með gott upplegg en þú þarft að fá menn til að trúa á það sem þú ert að gera. Það er helsta verkefni hvers þjálfara og helsta verkefni Túfa er að fá leikmenn til að kaupa það sem hann ætlar að láta þá gera. Ef það tekst munu þeir ná árangri því gæðin eru svo sannarlega til staðar.“
Hlusta má á Besta sætið í spilaranum hér fyrir ofan. Einnig má hlusta á þáttinn á Spotify og öðrum hlaðvarpsveitum.
