Oddvitaáskorunin: Blóðlangar að byrja að rækta mölorma á ný

Gylfi Ólafsson leiðir Í-listann í Ísafjarðarbæ í komandi sveitarstjórnarkosningum.

Gylfi hefur verið forstjóri Heilbrigðisstofnunar Vestfjarða frá 2018. Hann er með doktorspróf í heilsuhagfræði, starfsréttindi sem grunnskólakennari og meistaragráðu í hagfræði.

Gylfi hefur komið víða við; starfað hjá ferðaskrifstofunni Vesturferðum, verið fréttamaður RÚV, ráðgjafi í heilsuhagfræði, háskólakennari og aðstoðarmaður ráðherra. Meðal núverandi trúnaðarstarfa er seta í stjórn Fossavatnsgöngunnar, stjórn Félags forstöðumanna ríkisstofnana og íþrótta- og tómstundanefnd Ísafjarðarbæjar.

Gylfi á tvö börn og eiginkonu.

Hver er fallegasti staðurinn á Íslandi?

Hornvík og björgin sitthvoru megin.

Er eitthvað lítilvægt sem fer þó í taugarnar á þér í þínu sveitarfélagi sem þú vilt að sé lagað?

Lausaganga bíla er plága sem þarf að uppræta.

Hvert er þitt uppáhalds áhugamál sem gæti þótt skrítið?

Skordýrarækt og forritun. Ég hef að vísu ekki verið með skordýr í ræktun um nokkuð skeið en hef allar græjur til að byrja að rækta mjölorma og blóðlangar að byrja á því fljótlega.

Hver eru þín minnistæðustu samskipti við lögregluna?

Föstudagurinn langi 2020 í tengslum við bakvörðinn á hjúkrunarheimilinu Bergi. Almennt hafa öll samskipti við lögregluna í tengslum við Covid-faraldurinn verið eftirminnileg, meðal annars í tengslum við lokanir á skólum, uppsetningu á tímabundnum sóttvarnahótelum og fleira í þeim dúr.

Hvað færðu þér á pizzu?

„Forsetinn mínus kjöt“ á Mömmu Nínu. Lokaðu augunum, Guðni Th.: það er ananas á forsetanum.

Hvaða lag peppar þig mest?

Þjóðsöngurinn í kórútsetningu, Marsbúa cha cha með Bogomil Font, Tænder på dig með Jakobi Sveistrup og Sönn íslensk sakamál með Rottweiler-hundum.

Hvað getur þú tekið margar armbeygjur?

Svona tuttugu.

Göngutúr eða skokk?

Skokk, en ég kalla það trimm.

Uppáhalds brandari?

Við feðginin erum að leika okkur með afbrigði af brandaranum um pabbann sem kallar til dóttur sinnar „Viltu heita samloku?“ en dóttirin svarar því til að hún vilji bara áfram heita Elín.

Hvað er þitt draumafríi?

Ég er búinn að panta mér ferð á ísfirsku skútunni Auroru í haust, þar sem hlaupið verður um óbyggðir austurhluta Grænlands. Mig hefur lengi dreymt um ferð af þessu tagi, svo ætli það sé ekki draumafrí?

Hvort fannst þér 2020 eða 2021 vera verra ár?

2021. Árið 2020 var allt nýtt og áhugavert. 2021 var bara langdregið.

Uppáhalds tónlistarmaður?

Jón Múli Árnason, tónskáldið sem skrifaði mörg okkar fallegustu djasslög.

Hvað er það skrýtnasta sem þú manst eftir að hafa gert?

Einu sinni lét ég ekvadorskan töfralækni reka úr mér illa anda með eldi. Mér fannst það satt best að segja ekki gera mikið gagn.

Ef það væri gerð kvikmynd um ævi þína, hver ætti að leika þig? Má vera íslenskur eða útlenskur.

Elon Musk. Ef þú spyrð Ölmu Möller mun hún segja að Joel Kinnaman eigi að leika mig.

Hefur þú verið í verbúð?

Nei.

Áhrifamesta kvikmyndin?

Hin sænska Fucking Åmål. Nær svo mörgum góðum sammannlegum augnablikum unglingsáranna á ljúfsáran hátt.

Áttu eftir að sakna Nágranna?

Nei, hef ekki horft á þá í tuttugu ár. Mér fannst þó alltaf erfitt að fyrirgefa framhjáhald Karls Kennedy og klæjaði alltaf í augun þegar það stóð Kartan en ekki Kjartan í textanum.

Ef þú yrðir að flytja úr þínu sveitarfélagi, hvert myndir þú helst vilja fara?

Akureyri, Reykjavík eða Færeyja.

Uppáhalds „guilty pleasure“ lag? (skammast þín smá fyrir að hafa gaman af því – sakbitin sæla)

Sumir gætu skammast sín fyrir að syngja af mikilli innlifun með Börbru Streisand um ástfangna konu, Woman in love. Ég skammast mín samt ekki. Raunverulega sakbitin sæla er þó helst að hlusta á góð lög með tónlistarmönnum sem búið er að slaufa eða ljóstra upp að hafi verið hin mestu varmenni. Þar eru því miður allt of margir góðir tónlistarmenn undir, innlendir og erlendir. Sælan við að hlusta á margar perlur þessara manna er þar svo sakbitin að ég þori ekki einu sinni nefna tónlistarmennina á nafn.