92 sagt upp í hóp­upp­sögnum í síðasta mánuði

Í tilkynningu á vef stofnunarinnar segir að fimmtíu manns hafi verið sagt upp í sjávarútvegi þar sem gert sé ráð fyrir endurráðningu í september. Þá hafi 42 verið sagt upp í félagasamtökum. Uppsagnirnar koma til framkvæmda á tímabilinu maí til ágúst 2022.

Gera má ráð fyrir að uppsagnirnar innan félagasamtakanna hafi verið uppsagnirnar á skrifstofu Eflingar sem mikið var fjallað um í síðasta mánuði.

Í marsmánuði barst Vinnumálastofnun ein tilkynning um hópuppsögn en þar var 34 starfsmönnum sagt upp í fræðslustarfsemi.

Með hópuppsögn er átt við uppsagnir atvinnurekanda á fastráðnum starfsmönnum þar sem fjöldi starfsmanna sem sagt er upp á þrjátíu daga tímabili er að minnsta kosti 10 starfsmenn í fyrirtækjum sem venjulega hafa 21-99 í vinnu, minnst 10% starfsmanna í fyrirtækjum með 100-299 í vinnu eða minnst 30 starfsmenn þar sem venjulega eru 300 eða fleiri.