Stórstjörnunum í Brooklyn sópað í sumarfrí

Í hinum leikjum næturinnar þá komst Dallas Mavericks 3-2 yfir á móti Utah Jazz en Toronto Raptors minnkaði muninn í 3-2 á móti Philadelphia 76ers eftir annan sigurinn í röð.

Jayson Tatum hefur verið frábær í einvíginu á móti Brooklyn Nets og hann var með 29 stig í 116-112 sigri Boston Celtics á Nets í fjórða leiknum í röð. Boston menn þurftu reyndar að klára leikinn án Tatum því hann fékk sína sjöttu villu tæpum þremur mínútum fyrir leikslok.

Jaylen Brown skoraði 22 stig fyrir Boston og Marcus Smart var með 20 stig og 11 stoðsendingar. Boston mætir annað hvort Milwaukee Bucks eða Chicago Bulls í næstu umferð.

Það var mikið búist við af liði með þá Kevin Durant og Kyrie Irving innan borðs og þrátt fyrir að liðið hafði komið úr sjöunda sætinu voru sumir að spá því að þeir færu alla leið. Þeir komust hins vegar lítið áfram gegn Boston vörninni í þessu einvígi.

Kevin Durant átti reyndar sinn langbesta leik í einvíginu í nótt þegar hann var með 39 stig, 9 stoðsendingar og 7 fráköst. Seth Curry skoraði 23 stig og Irving var með 20 stig.

Annað lið sem lenti 3-0 undir í Austurdeildinni var lið Toronto Raptors sem lenti 3-0 undir á móti Philadelphia 76ers. Toronto menn unnu sinn annan leik í röð í nótt með 103-88 útisigri.

Pascal Siakam var með 23 stig og 10 fráköst og Precious Achiuwa skoraði 17 stig. Með þessum sigri tryggði Toronto sér annan leik og sá fer fram á heimavelli þeirra i Kanada.

Joel Embiid er að spila meiddur á þumal en hann var með 20 stig og 11 fráköst. James Harden skoraði 15 stig.

Luka Doncic var með 33 stig og 13 fráköst þegar Dallas Mavericks burstaði Utah Jazz 102-77 og komst 3-2 yfir í einvíginu. Þetta var annar leikur Doncic í einvíginu en Dallas liðið tapaði þeim fyrsta á lokasekúndunum þegar Utah skoraði fimm síðustu stig leiksins.

Það var ekkert slíkt á dagskránni í nótt. Jalen Brunson, sem varð að stjörnu í fjarveru Doncic, var með 24 stig í nótt og Dorian Finney-Smith skoraði 13 stig.

Jordan Clarkson var með 20 stig fyrir Utah og Rudy Gobert bætti við 17 stigum og 11 fráköstum. Donovan Mitchell sem skoraði 30 stig að meðaltali í fyrstu fjórum leikjunum í einvíginu skoraði bara níu stig í þessum leik og klikkaði hann á öllum sjö þriggja stiga skotum sínum.