Útlitið mjög svart hjá Lakers mönnum eftir enn eitt tapið

Nikola Jokic var með 38 stig, 18 fráköst og 6 stoðsendingar þegar Denver Nuggets vann 129-118 útisigur á Los Angeles Lakers. Þetta var fjórði sigur Denver í síðustu fimm leikjum og kom liðinu upp í fimmta sætið í Vesturdeildinni. Will Barton var með 25 stig og Aaron Gordon skoraði 24 stig.

Þetta var sjötti tapleikur Lakers liðsins í röð og liðið hefur nú tapað 28 af síðustu 38 leikjum sínum. Anthony Davis var með og skilaði fínum tölum með 28 stigum, 9 fráköstum og 8 stoðsendingum.

Liðið lék aftur á móti án LeBron James sem var frá vegna meiðsla en hann skoraði 38 stig í leiknum á undan en náði ekki að jafna sig í tíma fyrir leikinn í gær. James er að glíma við ökklameiðsli. James verður nú að spila tvo af síðustu fjórum leikjum til að ná lágmörkunum til að geta orðið stigakóngur deildarinnar í vetur.

Lakers hefur aðeins náð 21 leik með þá James, Davis og Russell Westbrook alla í búning. Westbrook var með 27 stig í þessum leik og Carmelo Anthony skoraði 17 stig.

Það var ekki nóg með að Lakers tapaði heldur varð útlitið enn verra eftir að San Antonio Spurs vann 113-92 sigur á Portland Trail Blazers og náði með því tveggja sigurleikja forskoti á Lakers í baráttunni um síðasta sætið inn í umspil fyrir úrslitakeppnina. Þetta er í raun þriggja leikja forskot því Spurs stendur betur innbyrðis.

Dejounte Murray og Jakob Poeltl voru ekki með Spurs liðinu en Keldon Johnson átti stórleik og skoraði 28 stig. Zach Collins var með 18 stig og tók 13 fráköst og Tre Jones var líka með 18 stig. Þetta var sjötti sigur í sjö leikjum hjá San Antonio.

Joel Embiid var magnaður þegar Philadelphia 76ers vann 112-108 útisigur á Cleveland Cavaliers em hann skoraði 44 stig og tók 17 fráköst. James Harden bætti við þrennu með 21 stigi, 10 fráköstum og 10 stoðsendingum.

Luka Doncic var með 32 stig og 15 stoðsendingar þegar Dallas Mavericks vann meistara Milwaukee Bucks 118-112 á útivelli. Giannis Antetokounmpo var með 28 stig og 10 fráköst.

Jaylen Brown skoraði 32 stig og Jayson Tatum var með 22 stig þegar Boston Celtics rúllaði yfir Washington Wizards með 42 stiga sigri en þetta var þrettándi sigur liðsins í síðustu sextán leikjum.