Giannis með sigur­körfuna á síðustu sekúndunum: Sjáðu hana í drauga­vélinni

Giannis Antetokounmpo skoraði 40 stig og tók 12 fráköst þegar Milwaukee Bucks vann 127-125 sigur á Charlotte Hornets en sigurkarfa hans kom tveimur sekúndum fyrir leikslok. Khris Middleton var með 21 stig.

„Hann er ekki alltaf að troða yfir menn og þetta var erfitt skot jafnvel fyrir bakvörð hvað þá svona stóran mann. Þetta sýnir gæðin sem hann hefur,“ sagði Khris Middleton.  Hér fyrir neðan má sjá sigurkörfuna i draugavélinni.

LaMelo Ball skoraði 36 stig fyrir Charlotte Hornets sem er það mesta sem hann hefur skorað í einum leik í deildinni. Kelly Oubre Jr. skoraði 25 stig og Miles Bridges var með 22 stig.

Ball hafði jafnað metin með þriggja stiga körfu 5,9 sekúndum fyrir leikslok en Giannis tókst að finna sér leið upp að körfunni þrátt fyrir að það væri ekki meira eftir en hann nýtti sér þá sendingu frá Jru Holliday.

Charlotte liðið skoraði 41 stig og tíu þriggja stiga körfur í fyrsta leikhluta og var þá sextán stigum yfir. Milwaukee vann sig inn í leikinn og komst í fyrsta sinn yfir undir lok þriðja leikhluta. Lokaleikhlutinn var síðan æsispennandi.

Boston Celtics hefur ekki skorað færri stig í sigri í fjögur ár en 88 stig nægðu í eins stigs sigri á Philadelphia 76ers. Jayson Tatum byrjaði leikinn kaldur en komst síðan í gang og skoraði 11 af 26 stigum sínum í fjórða leikhlutanum. Hann var einnig með 16 fráköst.

Robert Williams III innsiglaði þó sigurinn á hinum enda vallarins þegar hann varði lokaskot Georges Niang á síðustu sekúndunni. Al Horford var líka öflugur í vörninni og átti mikinn þátt í því að Joel Embiid hitti aðeins úr 3 af 17 skotum sínum í leiknum. Horford var sjálfur með 19 stig, 8 fráköst og 5 varin skot.

Luka Doncic var með 28 stig og 14 stoðsendingar á aðeins 27 mínútum þegar Dallas Mavericks vann 139-107 útisigur á New Orleans Pelicans en slóvenski bakvörðurinn vat kominn með 18 stig eftir fyrsta leikhlutann.

Dallas setti félagsmet með því að hitta úr 68,7 prósent skota sinna í leiknum (57 af 83). Kristaps Porzingis var með 20 stig og 10 fráköst. Liðið hafði tapað fimm af síðustu sex leikjum sínum fyrir leikinn.

Trae Young var flottur og setti niður tvö mikilvæg víti á lokasekúndunum þegar Atlanta Hawks vann 114-111 útisigur á Indiana Pacers en Young var með 33 stig, 10 stoðsendingar og 8 fráköst í leiknum.

Cleveland Cavaliers hafði ekki unnið í Miami í næstum því tólf ár og tapað tuttugu leikjum í röð í húsinu en burstaði heimamenn með 26 stiga mun í nótt, 111-85. Kevin Love skoraði 22 stig, Jarrett Allen var með 19 stig og 11 fráköst og Darius Garland skoraði 16 stig.

„2010? Ég var níu ára gamall,“ sagði nýliðinn Evan Mobley sem var með 17 stig og 11 fráköst en hann fékk að vita að þetta var fyrsti sigur Cleveland í Miami síðan 25. janúar 2010.