Bryn­dís í upp­námi í dóm­sal: „Allt í einu var hún bara um­snúin“

Viðstödd kvöldverðinn voru Carmen og móðir hennar, Jón Baldvin, Bryndís og íslensk nágrannakona þeirra á Spáni. Þeim ber ekki saman um hvað gerðist þetta kvöld en mæðgurnar segja Jón Baldvin hafa káfað á Carmen.

„Þetta hefði þá verið í fyrsta skipti á ævinni sem ég hefði orðið vör við það að maðurinn minn hefði auðmýkt mig með því að strjúka annarri konu,“ sagði Bryndís fyrir dómi í dag.

Hún lýsti síðan kvöldinu og aðdraganda þess. Þau hefðu sest niður við matarboðið og hún haldið stutta ræðu til að bjóða alla velkomna.

„Ég hafði ekki sleppt orðinu þegar Laufey [móðir Carmenar] bara: „Jón Baldvin, nú skalt þú biðjast afsökunar. Þú káfaðir á dóttur minni. Ég er búinn að heyra margar sögur um þig, þú ert ógeðslegur“,“ hermdi Bryndís eftir Laufeyju.

Hún segist hafa verið í svo „æðis­lega góðu skapi“ eftir daginn og með að vera komin með þessa gesti í hús sitt. Þetta hafi því komið alveg flatt upp á hana.

Orðin eins og umskiptingur

„Allt í einu var hún bara um­snúin,“ sagði Bryn­dís. „Hún hafði líka sagt mér að hún væri fár­veik, með ein­hverja grindargliðnun eða eitt­hvað,“ hélt hún á­fram og sagði Lauf­eyju hafa verið á sterkum lyfjum sem hún hafi ekki mátt drekka ofan í. 

„Ég fattaði það ekki strax en auð­vitað var hún búin að drekka frá sér allt vit.“

„Hún jós bara yfir okkur fúk­yrðunum,“ sagði Bryn­dís og þegar hér var komið sögu í vitnis­burði hennar hafði hún hækkað róminn mjög og var við það að bresta í grát. „Og ég bara skildi þetta ekki. Þetta var svo fal­leg stelpa sem ég hafði kynnst á Ísa­firði og var nú bara eins og um­skiptingur.“

Þeim hjónum og ná­granna­konu þeirra ber saman um að Lauf­ey hafi sakað Jón um að hafa káfað á dóttur sinni stuttu eftir að þau höfðu sest til borðs. Þau þver­taka fyrir að Car­men hafi á ein­hverjum tíma­punkti fram að því staðið upp til að hella víni í glös.

Að sögn Car­menar og Lauf­eyjar var það þó svo að Car­men hafði staðið upp frá borði á einum tíma­punkti yfir matnum og farið að sækja vín­flösku sem var kæld í vaski við hlið borðsins. Hún hafi síðan komið aftur að borðinu og þá staðið við hlið Jóns Bald­vins á meðan hún skenkti víni í glösin en hann hafi þá byrjað að strjúka rass Car­menar.

Hún hafi stirðnað upp við þetta og fengið á­fall, ekki gert neitt í málinu heldur sest aftur við hlið móður sinnar sem hafi þá krafið Jón Bald­vin um af­sökunar­beiðnina.