Real til­búið að bjóða 200 milljónir evra í Mbappé

Samkvæmt heimildum The Athletic er Real að undirbúa nýtt tilboð upp á 200 milljónir evra til að fá leikmann sem fæst frítt eftir aðeins tíu mánuði.

Í gær bárust fregnir af því að Real Madríd hefði boðið allt upp að 160 milljónir evra í Mbappé. Hvernig tilboð Real hljómaði var þó ekki vitað en að öllum líkindum var ekki um eingreiðslu að ræða. Venjulega eru fjárhæðir af þessum toga boraðar yfir 2-3 ára tímabil.

Heildarupphæðin nam samt sem áður 160 milljónum evra en Parísarliðið sagði takk en nei takk. 

Nasser Al-Khelaifi, forseti PSG, virðist ekki hafa neinn áhuga á að selja Mbappé að svo stöddu. Það er þó vitað að Mbappé hefur alltaf viljað spila fyrir Real Madríd, það hefur verið draumur hans frá því hann var krakki. Þá hefur Real ekki farið leynt með áhuga sinn á leikmanninum.

Mögulega telur Al-Khelaifi að Mbappé gæti skipt um skoðun og áhugi hans á Real dvínað eftir að spila með Gianluigi Donnarumma, Sergio Ramos og að sjálfsögðu Lionel Messi í vetur. Það er erfitt að færa rök fyrir því að Real sé á betri stað en PSG í dag og forseti félagsins vonast til að sú staðreynd sannfæri Mbappé - sem kostaði Parísarliðið 180 milljónir evra árið 2017 - um að vera áfram í París.

Að því sögðu væri það glapræði að treysta á að Mbappé skipti um skoðun því ef svo er ekki þá getur hann farið frítt til Madrídar eftir rétt rúma tíu mánuði.

Sem stendur virðist staða PSG vera sú að félagið ætli sér ekki að selja en á sama tíma er erfitt að segja nei við 200 milljónum evra. Það er hægt að kaupa töluvert af leikmönnum fyrir slíka upphæð, til að mynda Cristiano Ronaldo, Paul Pogba, Eduardo Camavinga eða Erling Braut Håland.

Hvernig hefur samt Real Madríd – félag sem er nánast á kúpunni – efni á að borga 200 milljónir evra fyrir leikmann?

Florentino Perez, forseti Real, er með Mbappé á heilanum. Hann er viss um að Mbappé verði næsta ofurstjarna í heimi fótboltans og slíkir leikmenn eiga heima í Real Madríd að mati Perez.

Kórónufaraldurinn hefur haft gríðarleg áhrif á allt starf Madrídarliðsins og er mögulega ástæða þess að Zinedine Zidane ákvað að kalla þetta gott og hætta sem þjálfari liðsins. Tekjutap félagsins hefur verið gríðarlegt og þá bætir ekki úr skák að rúmar 600 milljónir evra voru settar í endurbætur á Santiago Bernabeu, heimavelli liðsins.

Real hefur samt sem áður lagt allt í sölurnar til að finna fjármagn svo hægt sé að fá Mbappé til liðsins.

Launakostnað hefur verið skorinn niður og hlustað á tilboð í alla þá sem hafa tvo fætur og geta sparkað í bolta. Það ku vera ástæðan fyrir því að Perez sagði Carlo Ancelotti, nýráðnum þjálfara liðsins, að hann yrði að sætta sig við Nacho og Eder Militao í miðverði þar sem það yrði ekki endursamið við Sergio Ramos og Raphaël Varane væri á förum.

Ramos er í dag liðsfélagi Mbappé í París á meðan Varane var seldur til Manchester United á 40 milljónir evra. Martin Ødegaard var svo seldur til Arsenal þar sem enginn vildi kaupa Gareth Bale, Isco, Eden Hazard eða Luka Jovic. Félagið sparaði þó töluvert af pening með því að lána bæði Bale og Jovic á síðustu leiktíð. 

Þá voru Achraf Hakimi og Sergio Reguilon seldir á síðustu leiktíð og James Rodriguez fór frítt til Everton. Real hafði einnig náð samkomulagi við hollenska miðjumanninn Donny van de Beek en ákvað á endanum að fjárfesta ekki í honum og nýta peninginn frekar í Mbappé.

Það er deginum ljósara að Real Madríd vill Mbappé og félagið fær oftast nær það sem það vill. Cristiano Ronaldo, Luka Modrić, Gareth Bale, Thibaut Courtois og Eden Hazard eru ágætis dæmi.