Nýtt nafn en aftur Ólympíugull hjá Miller-Uibo og Allyson Felix setti met

Shaunae Miller-Uibo vann glæsilegan sigur í 400 metra hlaupi kvenna. Miller-Uibo kom í mark á 48,36 sekúndum sem er næstbesti tími sögunnar á Ólympíuleikunum en metið á áfram hin franska Marie-José Pérec frá leikunum í Atlanta árið 1996 (48.25 sekúndur). Þegar Miller-Uibo vann gullið í Ríó árið 2016 þá kom hún í mark á 49,44 sekúndum.

Miller-Uibo hét bara Shaunae Miller á síðustu leiknum en hefur gift sig eistneska tugþrautarkappanum Maicel Uibo í millitíðinni og mætti því með nýtt eftirnafn á þessa leika.

Marileidy Paulino frá Dómíníska Lýðveldinu fékk silfrið en hún bætti landsmetið í annað skiptið á þessum leik með því að hlaupa á 49,20 sekúndum

Allyson Felix varð önnur 2016 en tók bronsið í ár á 49,46 sekúndum. Það voru hennar tíundu verðlaun á Ólympíuleikum og er hún nú sú frjálsíþróttakona sem hefur unnið flest Ólympíuverðlaun en fyrir hlaupið var hún jöfn Merlene Ottey með níu.

Stephenie Ann McPherson sem vann bronsið fyrir fimm árum varð að sætta sig við fjórða sætið eftir harða barátu við Felix.

Faith Kipyegon vann 1500 metra hlaup kvenna á nýju Ólympíumeti en hún var að verja Ólympíutitil sinn. Kipyegon kom í mark á 3:53.11 mín. eftir flottan endaspretti.

Bretinn Laura Muir náði silfrinu á nýju persónulegu meti og Hollendingurinn Sifan Hassan, sem leiddi nær allt hlaupið varð að sætta sig við bronsið. Hassan er þegar búin að vinna 5000 metra hlaupið á þessum leikum og hún keppir síðan í tíu þúsund metra hlaupinu á morgun.

Kipyegon varð einnig heimsmeistari árið 2017 en varð að sætta sig við silfur á síðasta heimsmeistaramóti þegar hún tapaði á móti fyrrnefndri Hassan. Þetta er aftur á móti búið að vera mjög flott tímabil hjá henni sem hún fullkomnar með þessum sigri.

Heimsmethafinn Joshua Cheptegei frá Úganda vann 5000 metra hlaup karla og bætti þar með gulli við silfrið sem hann vann í tíu þúsund metra hlaupinu.

Þetta voru önnur gullverðlaun Úganda á leikunum því Peruth Chemutai vann 3000 metra hindrunarhlaup kvenna.

Cheptegei kom í mark á 12:58.15 mín. eða 46 hundraðshlutum á undan Mohammed Ahmed frá Kanada sem fékk silfur. Bandaríkjamaðurinn Paul Chelimo kom í mark á 12:59.05 mín. og fékk brons.

Chelimo kom í mark rétt á undan Keníamanninum Nicholas Kipkorir Kimeli en það munaði ekki miklu á fremstu mönnum.

Ahmed flutti til Kanada þegar hann var ellefu ára en hann er fæddur í Sómalíu. Chelimo er frá Kenía en fékk bandarískan ríkisborgararétt eftir að hafa gengið í bandaríska herinn.

Liu Shiying frá Kína varð Ólympíumeistari í spjótkasti kvenna eftir kast upp á 66,34 metra. Maria Andrejczyk frá Póllandi fékk silfur en hún kastaði lengst 64,61 metra.

Ástralinn Kelsey-Lee Barber var síðan aðeins fimm sentímetrum frá silfrinu en hún kastaði 64,56 metra í lokakasti sínu og tók bronsið.

Shiying varð aðeins í 23. sæti á síðustu Ólympíuleikum en fékk silfur á síðasta heimsmeistaramóti.