Anton þyrfti að vera með grímu og hengja sjálfur á sig ólympíuverðlaun

Thomas Bach, forseti alþjóðaólympíunefndarinnar, staðfesti við fjölmiðla í dag að verðlaunaafhendingar á leikunum yrðu með öðrum hætti en vanalega. Ástæðan er kórónuveirufaraldurinn, sem haft hefur svo mikil áhrif á leikana og leiddi meðal annars til þess að þeim var frestað um eitt ár.

Í stað þess að mikils metið fólk úr ýmsum áttum afhendi verðlaun og taki í hendur verðlaunahafa verður verðlaununum einfaldlega stillt upp á bakka við verðlaunapallinn. Gull-, silfur- og bronsverðlaunahafarnir sækja þau svo þangað og hengja um eigin háls, án þess að snerta aðra manneskju.

Leikarnir í Tókýó verða settir á föstudaginn eftir níu daga. Fyrstu ólympíumeistararnir verða svo krýndir laugardaginn 24. júlí en þá ráðast til að mynda úrslitin í loftskammbyssu, þar sem Ásgeir Sigurgeirsson er meðal keppenda.

„Við munum gæta þess að manneskjan sem setur verðlaunapeningana í bakkann geri það í sótthreinsuðum hönskum. Þau sem vísa á verðlaunin og íþróttafólkið munu vera með grímu. Það verða engin handabönd eða faðmlög við verðlaunaafhendinguna,“ sagði Bach.

Neyðarástand í Tókýó og íbúar vilja ekki Ólympíuleika

Neyðarástandi hefur verið lýst yfir í Tókýó vegna faraldursins en 1.149 ný smit greindust í dag, fleiri en greinst hafa á einum degi í næstum hálft ár í borginni. Mikill meirihluti japönsku þjóðarinnar er samkvæmt könnunum mótfallinn því að leikarnir verði haldnir í Japan við þessar aðstæður, jafnvel þó að áhorfendabann sé á leikunum og strangar sóttvarnareglur gildi fyrir keppendur.

Sundmaðurinn Anton Sveinn er líklegastur til afreka af þeim fjórum íslensku keppendum sem keppa í Tókýó. Hann hefur sjálfur sagt að draumurinn sé að vinna ólympíugull en ljóst er að hann er á leið í afar harða keppni í 200 metra bringusundi þar sem undanrásir eru eftir tæpar tvær vikur, eða upp úr klukkan 10 þriðjudagsmorguninn 27. júlí.

Auk Antons og Ásgeirs eru sundkonan Snæfríður Sól Jórunnardóttir og kringlukastarinn Guðni Valur Guðnason í ólympíuhópi Íslands í ár.