NBA dagsins: Haukarnir unnu upp fimmtán stiga forskot á síðustu sex mínútunum

Þetta var þriðji sigur Atlanta í jafn mörgum leikjum eftir að þjálfarinn Lloyd Pierce var látinn taka pokann sinn og Nate McMillan tók við starfi hans.

Fátt benti þó til að Atlanta myndi fara með sigur af hólmi í leiknum í nótt því þegar 4. leikhluti var hálfnaður leiddi Toronto með fimmtán stigum, 112-97.

Þá tóku Haukarnir við sér en þriggja stiga skot frá Stanley Johnson þegar ein mínúta og þrettán sekúndur voru eftir virtist hafa tryggt Toronto sigurinn, 120-113.

Atlanta skoraði hins vegar síðustu átta stig leiksins. Tony Snell tryggði liðinu sigurinn þegar hann setti niður þriggja stiga skot í þann mund sem leiktíminn rann út. Öll athygli varnar Toronto var á Trae Young sem kastaði boltanum út fyrir þriggja stiga línuna á Snell sem skoraði sigurkörfuna.

Young skoraði 37 stig og gaf sex stoðsendingar í leiknum. Dario Gallinari kom með tuttugu stig af bekknum og Clint Capela tók nítján fráköst og varði fimm skot. Atlanta er í 8. sæti Austurdeildarinnar með sautján sigra og tuttugu töp eins og Toronto.

Nick Powell skoraði 33 stig fyrir Toronto sem var án lykilmanna á borð við Pascals Siakam, Freds VanVleet og OG Anunoby. Toronto hefur tapað fimm af síðustu sex leikjum sínum.

Í spilaranum hér fyrir neðan má sjá brot úr leikjum Toronto og Atlanta, Brooklyn Nets og Boston Celtics og Portland Trail Blazers og Phoenix Suns auk flottustu tilþrifa næturinnar.

NBA er á Stöð 2 Sport en upplýsingar um útsendingar má finna hér. NBA körfuboltinn er hluti af Stöð 2 Sport erlent sem kostar 3.990 krónur á mánuði en einnig má kaupa útsendingar sem stakan viðburð á 990 krónur.