Reyndi að kæla Curry niður eftir leik með því að hella yfir hann úr vatnsflösku

Stephen Curry var sjóðandi heitur bæði fyrir og eftir hlé þegar hann skoraði 62 stig í sigri Golden State Warriors í NBA-deildinni í nótt. Hann bætti sitt persónulega met um heil átta stig.

Curry er fyrsti leikmaðurinn frá 1977 til að skora meira en 30 stig í hvorum hálfleik í sama leiknum. Síðastur til að afreka það á undanum honum var Pistol Pete Maravich.

Curry skoraði 31 stig í fyrri hálfleik og endurtók leikinn í seinni hálfleiknum.

Hann hitti úr 56 prósent skota sinna og setti niður 3 af 7 þriggja stiga skotum fyrir hlé en í seinni hálfleik nýtti hann 62 prósent skota sinna og setti niður 5 af 9 þriggja stiga skotum.

Curry skoraði 24 af 62 stigum sínum með þriggja stiga skotum en hann hitti úr 18 af 19 vítaskotum í leiknum.

Hér fyrir neðan má sjá svipmyndir frá frammistöðu Steph Curry í leiknum í nótt sem og þegar liðsfélagi hans, Damion Lee, kom og helti yfir hann úr vatnsflösku í viðtalinu eftir leikinn. Curry var svo sjóðandi heitur að auðvita þurfti að kæla hann niður.