Fjórir særðust í hnífaárás í Hanau

Ekki er ljóst hvað hópi manna sem stakk og særði fjóra vegfarendur gekk til í borginni Hanau í Þýskalandi í gærkvöldi. Lögregla telur þó ekkert benda til þess að árásirnar tengist fjöldamorði kynþáttahatara á fólki ef erlendum uppruna í borginni í febrúar.

Fjórir voru fluttir á sjúkrahús með stungusár í gærkvöldi en enginn þeirra er sagður í lífshættu. Talið er að hópur fimm til sjö manna hafi ráðist á fólkið. Tveir voru handteknir, grunaðir um aðild á árásunum, að sögn Reuters-fréttastofunnar. Meintu árásarmennirnir eru 29 og 23 ára gamlir.

Talsmaður lögreglunnar segir engar vísbendingar um að tengsl séu á milli árásanna í gær og fjöldamorðsins í febrúar. Þá skaut 43 ára gamall karlmaður sem hafði lýst rasískum skoðunum níu manns til bana á vatnspípubörum í Hanau áður en hann drap móður sína og að endingu sjálfan sig.