Ellefu lífeyrissjóðir eiga nærri helming hlutafjár í Icelandair

Ellefu lífeyrssjóðir eru meðal tuttugu stærstu hluthafa í Icelandair þar af er Lífeyrissjóður verslunarmanna annar stærsti hluthafi í félaginu. Formaður VR segir að ekki verði lagt upp í björgunarleiðangur fyrir Icelandair nema félagið standi vörð um réttindi fólks. Þá þurfi fyrst og fremst að huga að því við fjárfestingu að hún sé fýsileg fyrir sjóðsfélaga.

Icelandair hyggst segja upp stórum hluta starfsmanna sinna um mánaðarmótin vegna erfiðrar stöðu í kjölfar kórónuveirufaraldursins.

Bogi Nils Bogason framkvæmdastjóri félagsins sagði á Sprengisandi í gær að félagið hafi orðið fyrir miklu tekjutapi síðustu mánuði, í raun væri um væri að ræða algjöran tekjubrest. Félagið kæmist ekki gegnum sumarið nema nýtt fé kæmi inn. Nú sé stefnt á að gefa út nýtt hlutafé þar sem uppleggið er að fá fjárfesta að félaginu og hugsanlega kæmi ríkið í framhaldinu með lánalínur.

Stærsti hluthafinn í félaginu er Par Investment Partners L.P. Boston en það félag seldi um 0,2% hlut í flugfélaginu fyrir helgi og fer nú með 13,5 % hlut í félaginu.

Meðal annarra stærstu hluthafa í Icelandair eru ellefu lífeyrissjóðir. Þar er Lífeyrissjóður Verslunarmanna næststærstur með um tólf prósenta hlut. Samkvæmt upplýsingum fréttastofu er verið að meta kosti þess þar að kaupa nýtt hlutafé í Icelandair. Samtals eiga lífeyrisjóðirnir eiga 43,6% í Icelandair

Gildi, Birta og Lífeyrissjóður starfsmanna ríkissins A- deild eru í þriðja, fjórða og fimmta sæti og aðrir lífeyrissjóðir þar fyrir neðan. 

Mikil lækkun hefur verið á hlutabréfaverði félagsins síðustu þrjá mánuði en gengið var um 6 á hlut í byrjun mars en var í kringum 2,8 í morgun og hafði hækkað um frá því fyrir helgi. 

Ragnar Þór Ingólfsson formaður VR segir að ekki verði farið í björgunaraðgerðir vegna Icelandair nema það sé góður fjárfestingarkostur.

„Staðan er flókin fyrir lífeyrissjóði sem eru stórir hluthafar í Icelandair og þeir þurfa fyrst og fremst að taka ákvarðanir sem byggja fyrst og fremst á hagsmunum sjóðsfélaga.   Lífeyrissjóðir hafa enga heimild til þess að taka mikla áhættu þannig að þeir munu taka ákvörðun út frá gæðum fjárfestingarinnar sem slíkrar. Þeir munu ekki bara koma með fjármagn inn í félagið af því ríkið gerir það. Þetta verður tekið á faglegum forsendum. Þá hafa verkalýðsfélögin ályktað að lífeyrissjóðir taki tillit til þess hvernig komið er fram við starfsfólk og að fyrirtæki fari að leikreglum á vinnumarkaði sem við höfum sett þegar teknar eru ákvarðanir um fjárfestingar almennt. við fylgjumst mjög vel með því hvað sjóðirnir eru að gera þessa dagana. Þeir eru í mjög sérstakri stöðu þar sem að markaðir hafa verið í frjálsu falli og mörg fyrirtæki í eigu lífeyrissjóðanna líta ekkert alltof vel út,“ segir Ragnar Þór. 

Það sé ekki öfundsverð staða að stjórna lífeyrissjóði í dag. 

„Það er ekki hægt að réttlæta frekari fjárfestingar nema hægt sé að sýna fram á rekstrarlegar forsendur. Það gera sér allir grein fyrir því að þegar flugið og ferðaþjónustan taka við sér aftur þá gerist það hægt og verður ekki liðið að það verði „gamblað“ með eignir sjóðsfélaga. Það verðru ekki farið í sérstakar björgunaraðgerðir bara til að tryggja aðgjang að fjármagni frá ríkinu heldur verður aðeins tekin fagleg ákvörðun,“ segir Ragnar Þór.