„Gera fólki kleift að flýja þennan raunveruleika”

„Við erum staðráðin í því að líta á þessa erfiðleika sem sóknartækifæri og erum nú á fullu að aðlaga reksturinn að breyttu rekstrarumhverfi. Við höfum fjárfest í sýndarveruleika gleraugum, leikjatölvum, borðspilum, karíókí-græjum og öðrum álíka búnaði, sem er kjörin afþreying fyrir einstaklinga og fjölskyldur til að notast við í heimahúsum,” segir Gunnar Leó Pálsson verkefnastjóri Rent A Party.

Líkt og nafn fyrirtækisins gefur til kynna þá sérhæfir það sig í því að leigja út alls kyns búnað fyrir mannfögnuði og viðburði. Í ljósi aðstæðna hefur fyrirtækið þurft að huga að miklum breytingum, enda samkomubann í gildi og afskaplega lítið um veislur og viðburði um þessar mundir. Fyrirtækið finnur óhjákvæmilega fyrir samdrætti, enda bitna áhrif kórónuveirunnar illa á fyrirtækjum í skemmtana- og viðburðageiranum.

„Við erum að horfa á 95 - 100 % samdrátt á þeim árstíma sem er almennt hvað stærstur á árinu hjá fyrirtækinu. Undir venjulegum kringumstæðum komum við almennt að um 30-50 veislum á einn eða annan máta um hverja einustu helgi og vorum til að mynda með bókaðan búnað í rúmlega 100 fermingar,” segir Gunnar Leó spurður út í áhrif kórónuveirunnar á reksturinn.

Gleraugun vinsæl

Eins og áður segir hefur fyrirtækið fjárfest í nýjum vörum til að aðlagast breyttu rekstrarumhverfi og segist Gunnar Leó finna fyrir því að fólk sé að taka vel í nýju vörurnar.

„Fyrstu viðbrögð við þessari nýbreytni eru afar góð og þetta nýja vöruúrval er að vekja lukku. Sýndarveruleika gleraugun eru sérstaklega vinsæl en þau eru bæði frábær skemmtun og gera fólki kleift að flýja þennan raunveruleika fyrir einhvern meira spennandi, sem er líklega sérstaklega eftirsóknarvert þessa dagana. Þá hefur einnig verið nokkuð um að fólk sé að bóka karíókí-græjurnar okkar og höfum við fengið fregnir af bráðskemmtilegum karíókí-fjölskyldukvöldum, en sú tilhugsun gleður okkur sérstaklega þessa dagana,” útskýrir Gunnar Leó.

Hann segir jafnframt að fyrirtækið ætli sér að koma sterkara sem aldrei fyrr úr þessu erfiða ástandi. „

Við ætlum okkur að koma fílefld til baka, þegar við sem þjóð höfum sigrast á þessari vá og samkomubanninu verður aflétt. Við vonumst jafnframt til þess að þessi viðsnúningur í vöruframboði muni stytta fólki stundir og létta okkur lífróðurinn þangað til.”