Forsmekkur af Super Bowl í NFL-deildinni í kvöld?

Kansas City Chiefs og New Orleans Saints eru án vafa tvö af bestu liðum NFL-deildarinnar í ár en það hafa þau bæði sýnt með því að vinna tíu leiki í fyrstu þrettán umferðunum. Það er því spennan fyrir leik liðanna í kvöld.

Það er ljóst að þau munu ekki geta mæst í úrslitakeppninni fyrr en í fyrsta lagi í sjálfum Super Bowl leiknum í febrúar. Sumir spámenn sjá jafnvel það fyrir sér að þessi leikur í kvöld gæti verið forsmekkur af leik liðanna í Super Bowl í byrjun febrúar á næsta ári.

Kansas City Chiefs er nú efsta liðið í Ameríkudeildinni með tólf sigra og aðeins eitt tap en New Orleans Saints er við hlið Green Bay Packers á toppi Þjóðardeildarinnar með tíu sigra og þrjú töp.

Meistararnir í Kansas City Chiefs unnu sinn áttunda leik í röð um síðustu helgi og hafa ekki tapað síðan að liðið lá óvænt á móti Las Vegas Raiders í október.

New Orleans Saints var líka á mikilli sigurgöngu og hafði unnið níu leiki í röð þegar kom að leiknum við Philadelphia Eagles um síðustu helgi.

Sean Payton, þjálfari New Orleans Saints, var að hugsa um að velja Patrick Mahomes í nýliðvalinu 2017 sem eftirmann Drew Brees. Chiefs átti valréttinn á undan og valdi Mahomes.

Mahomes hefur síðan umbreyst í besta leikmann deildarinnar og leiddi Kansas City Chiefs til NFL-titilsins á síðustu leiktíð.

Drew Brees var þarna 38 ára gamall en hann er enn að spila. Fjöldi rifbeinsbrota hafa hins vegar komið í veg fyrir að Drew Brees hafi spilað undanfarna fjóra leiki Saints-liðsins.

Brees er sagður allur að braggast en það var samt búist við því að Sean Payton taki enga áhættu og tefli áfram fram Taysom Hill. Annað hefur komið á daginn því Brees mun spila þennan mikilvæga leik.

Saints-liðið hefur unnið 3 af 4 leikjum með Taysom Hill sem leikstjórnanda en hann vill miklu frekat hlaupa með boltann sjálfur en að kasta honum fram völlinn og er því í raun algjör andstæða Drew Brees.

Frábær vörn og góður hlaupaleikur hafa aftur á móti séð til þess að New Orleans Saints hefur lifað nokkuð góðu lífi án Drew Brees. Stóra prófið er vissulega í kvöld á móti gríðarlega sterku lið meistaranna.

Það er alltaf mikil veisla þegar Patrick Mahomes mætir til leiks enda von á bombu í hverri sókn og oftast öruggt að liðið hans skori mikið í sínum leik.

Útsending frá leik Kansas City Chiefs og New Orleans Saints hefst klukkan 21.20 á Stöð 2 Sport en á undan verður sýndur leikur Miami Dolphins og New England Patriots á sömu rás. Útsending frá honum hefst klukkan 17.55.

NFL er á Stöð 2 Sport en upplýsingar um útsendingar má finna hér. NFL er hluti af Stöð 2 Sport erlent sem kostar 3.990 krónur á mánuði. Beinar útsendingar frá öllum leikjum eru á NFL Game Pass sem hægt er að kaupa sem viðbót við Sportpakkann á 2.000 krónur á mánuði.