Vilja sameina kosti útsýnis, gróðurs og heita vatnsins úr göngunum í nýjum baðstað

Greint var á verkefninu á vef N4 í gær en að því stendur einkahlutafélagið Skógaböð, sem er í eigu hjónanna Finns Aðalbjörnssonar og Sigríðar Maríu Hammer. Í samtali við Vísi segir Finnur að skipulagsvinna sé þegar hafin en vonir standa til að verklegar framkvæmdir geti hafist næsta vor.

Baðstaðurinn verður staðsettur í skógi vöxnu landi Ytri Varðgjár í Eyjafjarðarsveit, þar sem hægt verður að sameina kosti skjólsæls gróðurs og einstaks útsýnis í Eyjafirði, að því er segir í tilkynningu frá Skógarböðum. Hönnun baðstaðarins er í fullum gangi, þar sem sérstaklega sé horft til þess að skapa staðnum skýra sérstöðu.

Í skipulagslýsingu vegna verkefnisins kemur fram að gert sé ráð fyrir að heitt vatn verði leitt að staðnum með lögn frá Vaðlaheiðargöngum, í samstarfi við Norðuorku. Töluvert heitt vatn fannst við gangagerðina og hafa verið uppi hugmyndir um að nýta vatnið í einhvers konar baðstað, líkt og nú virðist ætla að verða raunin.

Í fyrsta áfanga er gert ráð fyrir baðlóni, köldu baði og gufuböðum, en á seinni stigum er stefnt að því að þróa frekari ferðaþjónustengda starfsemi á svæðinu.

„Við höfum mikla trú á aðdráttarafli Norðurlands þegar ferðaþjónustan fer af stað aftur. Meðal annars þess vegna höfum við tröllatrú á þessu verkefni. Ef allt gengur eftir gætu verklegar framkvæmdir hafist næsta vor og við byrjað að taka við gestum árið 2022. Við höfum alls staðar þar sem við höfum kynnt verkefnið fengið mjög jákvæðar viðtökur, enda margir á þeirri skoðun að það vanti öflugan segul í ferðaþjónustunni hérna á Eyjafjarðarsvæðinu,“ er haft eftir Finni í tilkynningunni.