Þing­menn fengu körfu hlaðna kræsingum frá Land­búnaðar­kla­sanum

Þingmaðurinn birti mynd af glæsilegri matarkörfu drekkhlaðinni allskyns kræsingum, matarkyns og áfengum drykkjum, á Facebooksíðu sinni.

Landbúnaðarklasinn er hugarfóstur Bændasamtakanna sem vildu breyta um íslenskan landbúnað. Sunna Gunnars Marteinsdóttir, kærasta Gunnars Braga, er varaformaður Landbúnaðarklasans.

Þingmenn hafa því í sitthvað gott að bíta nú á aðventunni en Píratar ætla reyndar að neita sér um það. Í samtali við fréttastofu segir Björn Leví Gunnarsson alþingismaður þetta vera á afar gráu svæði. Píratar hafi því gripið til þess ráðs að gefa körfuna til hjálparsamtaka.

Búvörulög til afgreiðslu sama dag og karfan barst

Einhver gæti talið þetta lobbýisma á sterum; það er þegar hagsmunasamtök fara offari við að ota sínum tota og jafnvel næsti bær við mútur?

Björn Leví segir það rétt, ekki síst því búvörulög voru til atkvæðagreiðslu seinna þann sama dag og karfan barst. Hann segir að þeim hafi borist skilaboð, hvort þau í þingflokknum gætu tekið við „smá körfu“? Björn Leví segir að ekki sé um neina „smá“ körfu að ræða, verðmæti hennar hljóti að fara vel yfir fimmtíu þúsund krónur og þá þýði þá það að þingmönnum sé skylt að færa það til bókar í hagsmunaskráningu.

Björn Leví segir að þetta hafi verið afar óþægilegt því þau gátu ekki brugðist við með því að afþakka hina drekkhlöðnu körfu, þingverðirnir hafi fært þeim körfuna og því hafi verið gripið til þess ráðs að gefa hana áfram til þeirra sem ætla má að þurfi á henni að halda.

Inga segir kælivöruna komna í ísskápinn

Inga Sæland, formaður Flokks fólksins segir það rétt, þingflokkunum hafi borist matarkarfa frá Landbúnaðarklasanum.

„Ég hef enn ekki haft tíma til að skoða þetta nánar . En umfangið er í takti við stærð flokka ef ég skil þetta rétt.“

Þannig að þið eruð ekki að fá hlutfallslega mest sem minnsti þingflokkurinn?

„Nei ekki frekar en „sannleikurinn“ um að við séum með fleiri starfsmenn fyrir flokkinn en þingmennirnir telja,“ segir Inga og hlær. Spurð, í ljósi þess sem hún segir að hún hafi ekki haft tök á að skoða körfuna nánar, hvort þarna sé ekki eitthvað góðgæti sem þurfi að koma í kæli og liggi þá undir skemmdum segir Inga: 

„Það er í ísskáp á skrifstofunni okkar í Austurstræti, sem þangað þarf að fara.“

Vísir hefur ekki upplýsingar um hvort þau sem nú eru utan flokka, Rósa Björk Brynjólfsdóttir og Andrés Ingi Jónsson, hafi fengið góðgæti frá Landbúnaðarklasanum eða hvort þau verði að fá að smakka hjá sínum fyrrverandi félögum í Vinstri grænum.

Fréttin hefur verið uppfærð með upplýsingum um tengslum þingmanns við stjórnarmann Landbúnaðarklasans.