Vara við svikahröppum í aðdraganda Svarts föstudags og Netmánudags

Síðustu daga hefur Netöryggissveitin séð aukningu í svikaherferðum í nafni sendingarfyrirtækja. 

Í tilkynningu frá Cert-ÍS, netöryggissveitar á vegum Póst- og fjarskiptastofnunar, segir að rekja megi aukninguna til stórtilboðsdagsins „Dags einhleypra“ þann 11. nóvember þar sem verslanir kepptust við að hafa tilboð á vefverslunum sínum og bjóða upp á heimsendingarþjónustu.

Svikarar nýti sér oft viðburði sem þennan til að hrinda af stað svikaherferðum og megi búast við fleiri herferðum nú þegar „Svartur föstudagur“ og „Netmánudagur“ eru í vændum.

„Svikaherferðirnar virka þannig að sett er upp fölsk vefsíða þar sem notandi er minntur á að greiða sendingarkostnað vegna nýlegra vörukaupa. Síður sem þessar verða sífellt trúverðugri og getur reynst erfitt að greina svikasíður frá raunverulegum greiðslusíðum,“ segir í tilkynningunni.

Áður en kreditkortanúmer er gefið upp sé því gott að staldra við og hugsa hvort það sé eitthvað sérkennilegt við greiðslusíðuna eða tilkynninguna.

Svartur föstudagur er á morgun og Netmánudagur á mánudaginn.