Reiði vegna ummæla um brottvísunarsvæði: „Hér er verið að ruglast all skelfilega“

Áslaug Arna Sigurbjörnsdóttir, dómsmálaráðherra, viðraði í óundirbúnum fyrirspurnartíma í morgun hugmyndir um að vista fólk á afmörkuðu svæði eftir að ákveðið hefur verið að vísa því úr landi. Sagði Áslaug úrræðin til skoðunar og vísaði í fyrirkomulag erlendis.

„Víða í löndunum í kringum okkur er þessu háttað þannig að aðilar eru á ákveðnu svæði eftir að þeir fá til dæmis neitun frá báðum stjórnsýslustigum til að það sé hægt að framkvæma þetta með auðveldari hætti og það gerist þá ekki að aðilar séu týndir inn í samfélaginu, sagði Áslaug og bætti við að lagabreytingu þyrfti til að taka fyrirkomulagið upp.

Þessari hugmynd hefur verið mótmælt harðlega úr ýmsum áttum í dag. Ýmsir þingmenn stjórnarandstöðunnar hafa stigið fram og sett sig upp á móti hugmyndinni og spurði Logi Einarsson, formaður Samfylkingarinnar, á hvaða leið við værum þegar umræðan er komin út í hugmyndir um afmörkuð brottvísunarsvæði fyrir fólk og börn á flótta. Sú umræða væri ömurleg.

Rósa Björk Brynjólfsdóttir, sem sagði sig úr VG, meðal annars út af flóttamannamálum, sagði að vonbrigði sín væru djúpstæð yfir því að verið sé að íhuga svo ómanneskjulegan möguleika.

Þórunn Ólafsdóttir, sem hefur unnið ötult starf í þágu flóttafólks, sagði að slíkt brottvísunarsvæði væri ekkert annað en fangelsi og spyr hvers vegna verið sé að ræða um barnafangelsi á Íslandi árið 2020.

Hún segir umræðuna á Alþingi sýna að við séum þegar komin á hættulegar slóðir. Mörkin færist til þegar hugmyndum á borð við þessa sé varpað fram af fólki í áhrifastöðu.

„HVAR ER VG?“

Ljóst er að tillagan hefur komið illa við marga og hafa margir lýst yfir vonbrigðum og reiði á samfélagsmiðlum. Margir eru undrandi á því að slíkt hafi yfirhöfuð verið nefnt og spyrja hvort þetta sé í umboði Vinstri grænna. 

„Nákvæmari fyrirsögn: „Dómsmálaráðherra viðrar möguleika á flóttamannabúðum“,“ skrifar Hildur Lilliendahl á Twitter og spyr hvar Vinstri grænir séu í ríkisstjórninni.

Sara Dögg Svanhildardóttir, fulltrúi Viðreisnar í bæjarstjórn Garðabæjar, er undrandi á tillögunni. Vonast hún til þess að kollegar sínir á þinginu ræði við ráðherra.

Óskar Steinn Jónínuson Ómarsson, fyrrverandi varaformaður Ungra jafnaðarmanna, vísar til aðstæðna á landamærum Bandaríkjanna.

Þá hafa fleiri tjáð sig um málið á Twitter og eru vægast sagt ósátt við hugmyndina.

Hafna því að ummælin endurspegli stefnu ríkisstjórnarinnar

Kári Gautason, framkvæmdastjóri þingflokks Vinstri grænna, sagði á Twitter fyrr í dag að hugmyndin um slíkt brottvísunarsvæði væri hvorki á þingmálaskrá né í fjárlögum. Sagði hann færslu Helgu Völu Helgadóttur, þingmanns Samfylkingarinnar, vera þvætting og „þreytandi tegund af lygum“.

Helgi Hrafn Gunnarsson, þingmaður Pírata, svaraði færslunni og sagði tortryggni fólks skiljanlega. Nú þegar hefði verið reynt að leggja fram „skelfilegt útlendingafrumvarp“ sem ætti að reyna við aftur.

„Fólk trúir þessu upp á ríkisstjórn ykkar vegna þess að þið eruð ekki að standa vaktina.“

Þá sagði Kári fólk vera að blása út samsæriskenningu með því að halda því fram að málið væri hluti af stefnu ríkisstjórnarinnar. Hugmyndin væri fráleit en það væri „arfavitlaus populismi“ að halda því fram að þetta væri í umboði ríkisstjórnarinnar.

Kolbeinn Óttarsson Proppé, þingmaður Vinstri grænna, gagnrýndi hugmyndina á Facebook-síðu sinni í dag og sagðist aldrei munu samþykkja hana. 

„Þetta er fráleit hugmynd og ég bendi á að hana er ekki að finna á þingmálaskrá ráðherrans, í ætlunum fjárlaga eða fjármálaáætlunar.“