Ó­vissa um að­komu líf­eyris­sjóðanna að hluta­fjár­út­boði Icelandair

Hlutafjárútboð Icelandair hefst í dag og í Fréttablaðinu segir að mikil óvissa sé um mögulega aðkomu lífeyrissjóðanna að útboðinu. Þátttaka þeirra er talin ráða úrslitum um hvort félaginu takist að sækja sér nýtt hlutafé.

Í blaðinu segir að fjórir stærstu sjóðirnir – Lífeyrissjóður verslunarmanna, LSR, Gildi og Birta – hafi ekki enn gefið það út hvort þeir ætli að taka þátt. Stjórnir sjóðanna munu hafa boðað til fundar síðar í dag og snemma á morgun þar sem endanleg ákvörðun verður væntanlega tekin.

Markaður Fréttablaðsins segist hafa heimildir fyrir því að mest óvissa ríki um afstöðu Lífeyrissjóðs verslunarmanna og Gildis en stjórn fyrrnefnda sjóðsins kemur saman til fundar eftir hádegið.

Blaðið segir talsverða gjá vera á milli fulltrúa atvinnurekenda annars vegar og fulltrúa VR hins vegar í stjórninni um hvort lífeyrissjóðurinn eigi að koma að útboðinu. Sjóðurinn er í dag næststærsti hluthafi Icelandair með um 11,8 prósenta hlut.