Eykt með lægsta til­boð í upp­steypu nýs þjóðar­sjúkra­húss

Verktakafyrirtækið Eykt átti lægsta tilboðið í uppsteypu á nýju þjóðarsjúkrahúsi við Hringbraut, en verkið var boðið út fyrr á þessu ári. Alls höfðu fimm fyrirtæki verið metin hæf til að bjóða í framkvæmdina en fjögur tilboð bárust. Stefnt er að því að spítalinn verði tekinn í notkun árið 2026.

Fyrirtækin sem höfðu verið metin hæf voru Eykt, Íslenskir aðalverktakar, Ístak, Rizzandi De Eccher/Þingvangur og ÞG verktakar. ÞG verktakar skiluðu ekki inn tilboði.

Kostnaðaráætlun verksins var metin rúmlega 10,5 milljarðar en lægsta tilboðið hljóðaði upp á 8.687.513.317 krónur, sem nemur um 82,67 prósentum af áætluðum kostnaði. 

Næst lægsta tilboðið kom frá Rizzani De Eccher/Þingvangi og hljóðaði það upp á 8,7 milljarða. Eitt tilboð var yfir kostnaðaráætlun frá Íslenskum aðalverktökum.

Tilboð bárust frá eftirtöldum fyrirtækjum:

• Eykt 8.687.513.317 kr. (82,67%)
• Íslenskir aðalverktakar 12.391.331.160 kr. (117,92%)
• Ístak 10.372.866.483 kr. (98,71%)
• Rizzani De Eccher S.P.A. og Þingvangur. 8.728.083.840 kr. (83,06%)

70 þúsund fermetrar 

Stefnt er að því að uppsteypun hefjist á þessu ári en haft er eftir Gunnari Svavarssyni framkvæmdastjóra NLSH ofh. í tilkynningu að þetta sé stærsti áfangi verkefnisins til þessa. Jarðvegsframkvæmdir hafi gengið vel en nú hefjist nýr kafli.

„Áætlanir okkar eru þær að uppsteypan geti hafist þegar í nóvember þegar búið verður að ganga frá samningum um framkvæmdina. Framkvæmdatími verksins er um þrjú ár. Þessu verki hefur fylgt jákvæður hugur og við vonumst eftir þvi að þessi stóra framkvæmd muni ganga vel og stefnt er að að nýr spítali verði tekinn í notkun 2026,“ segir Gunnar, en áætlað er að húsið verði um 70 þúsund fermetrar.

Meðferðarkjarninn mun vera stærsta byggingin í Hringbrautarverkefninu, en þar mun þungamiðja starfsemi Landspítalans verða. Kröfurnar sem gerðar hafa verið um aðbúnað í meðferðarkjarnanum séu sambærilegar þeim sem gerðar eru í nýjum háskólasjúkrahúsum í nágrannalöndum okkar.

Starfsmenn Landspítalans koma að hönnunarferli hússins en aðalhönnuðir eru Corpus hópurinn.

Tvö opin útboð eru nú í auglýsingu hjá Ríkiskaupum og eru bæði vegna vinnubúðasvæðisins. Annað snýst um jarðvinnu og veitnagerð á svæðinu og hitt um vinnubúðirnar sjálfar og kaup á gámum. Tilboðsfrestur er til 3. september næstkomandi.