Þingheimur þurfi „svör við mörgum spurningum“ varðandi ríkisábyrgð Icelandair

Oddný G. Harðardóttir, þingflokksformaður Samfylkingarinnar, telur að þingheimur þurfi að fá „svör við mörgum spurningum“ áður en hægt verði að samþykkja það að íslenska ríkið ábyrgist lánalínu til Icelandair.

Formenn stjórnarandstöðuflokkanna, nefndarmenn fjárlaganefndar þingsins og fjármálaráðherra héldu síðdegis á fund til að ræða um efni frumvarps til fjáraukalaga, sem er heimild til handa ráðherra til að veita Icelandair Group sjálfskuldarábyrgð frá ríkissjóði á lánalínum vegna þess mikla tekjufalls sem fyrirtækið hefur orðið fyrir vegna heimsfaraldursins. Bogi Nils Bogason, forstjóri Icelandair, hitti meðal annars fjárlaganefnd á fundinum, þar sem hann fór yfir stöðina frá sjónarhóli flugfélagsins.

Alþingi þarf að samþykkja ríkisábyrgðina en það kemur saman á morgun á svokölluðum þingsstubbi, þar sem meðal annars þarf að taka afstöðu til ríkisábyrgðar á lánalínu ti Icelandair.

Oddný sat fundinn í dag og ræddi stöðina í Reykjavík síðdegis í dag, en þar sagði hún að skynsamlegt væri af hálfu stjórnvalda að skoða stöðu Icelandair, þó að mörgum spurningum væri ósvarað af hálfu ríkistjórnarinnar vegna málsins.

„Félagið er umfangsmikið í hagkerfinu. Það eru verðmæti í orðsporinu, í leiðakerfinu, í þekkingu og reynslu starfsmannanna. En við þurfum líka að meta það frá öllum hliðum hver áhættan er að koma með ríkisaðstoð inn í flugfélag sem er í miklum þrengingum. Það er heilmargt sem við þurfum að fara yfir. Við þurfum að rýna ársreikninga félagsins, skoða hverjir eru raunverulegir eigendur þess og meta þessa stöðu alla hvernig gæti með þessari ríkisaðstoð samkeppnishæfni flugfélagsins verið til framtíðar,“ sagði Oddný.

Aðspurð hvort að sú leið sem ríkisstjórnin hafi valið að fara sé besta leiðin sagðist Oddný ekki vera með forsendur til þess að svara spurningunni, enda hafi stjórnarandstaðan aðeins fyrst nú í dag fengið kynningu á því hvernig málin standa. Skýra þurfi meðal annars hvaða skilyrði fylgi lánalínunni, svo dæmi séu tekin.

„Við þurfum að fá skýr svör við þessu. Það er svo margt sem við þurfum að spyrja um inn í fjárlaganefnd og inn í þingsal,“ sagði Oddný, sem er þó á því að vert sé að að skoða hvernig ríkið geti aðstoðað Icelandair.

„Þess vegna segi ég að það er sannarlega þess virði að skoða með hvaða hætti ríkið getur komið félaginu til aðstoðar. Þetta er lending og hugmynd sem að ríkisstjórnin og félagið hafa sæst á fara. Nú þurfum við að skoða hana,“ sagði Oddný.

Ekki eru margir dagar til stefnu en engu að síður segir Oddný að Alþingi þurfi að vanda vel til verka í málinu, þar sem háar fjárhæðir eru undir, um fimmtán milljarðar að mati ríkisstjórnarinnar.

„Þetta fer ekkert smurt í gegn. Við þurfum að fá svör við mörgum spurningum. Það er sannarlega ábyrgðarhluti þegar við löggjafinn erum að ákveða að taka svona háa upphæð til að ábyrgjast fyrir félag á markaði. Það verður ekki hrist út úr erminu. Við þurfum öll, ekki bara stjórnarliðar, heldur líka stjórnarandstaðan að vera sannfærð um að þessi leið sé góð og ef að það þarf að gera á henni einhverjar bætur þá vinnum við þær saman í þinginu.“