Vinur Trump dæmdur í rúmlega þriggja ára fangelsi

Alríkisdómari í Washington-borg dæmdi Roger Stone, vin og ráðgjafa Donalds Trump Bandaríkjaforseta, í fjörutíu mánaða fangelsi fyrir að ógna vitni, meinsæri og að hindra framgang réttvísinnar til að hlífa forsetanum í dag. Trump forseti hefur sett mikinn þrýsting á dómsmálaráðuneytið, dómarann og saksóknara í málinu undanfarna daga.

Brotin framdi Stone í tengslum við rannsókn á því hvort að hann hefði haft vitneskju um tölvupósta sem rússneskir hakkarar stálu frá Demókrataflokknum og lekið var til Wikileaks árið 2016. Saksóknin gegn Stone á rætur sínar að rekja til Rússarannsóknarinnar svonefndu sem Robert Mueller, þáverandi sérstaki rannsakandi dómsmálaráðuneytisins, stýrði. Kviðdómur sakfelldi Stone fyrir brotin í nóvember.

Amy Berman Jackson, dómarinn í málinu, úthúðaði Stone í dómsorði sínu og sagði hann hafa hindrað mikilvæga rannsókn þingnefndar með augljósum lygum, þrýstingi á viðkvæmt vitni og með því að fela hundruð skjala, að því er segir í frétt New York Times.

„Hann var ekki sóttur til saka til að koma einhverjum til góða pólitískt. Hann var ekki sóttur til saka, eins og einhverjar hafa kvartað undan, fyrir að koma forsetanum til varnar. Hann var sóttur til saka fyrir að hylma yfir fyrir forsetann,“ sagði dómarinn.

Mikil styr hafði staðið um kröfu ákæruvaldsins um refsingu yfir honum. Upphaflega fóru saksóknarar fram á að hann yrði dæmdur í sjö til níu ára fangelsi. William Barr, dómsmálaráðherra, greip fram fyrir hendurnar á þeim að örfáum klukkustundum eftir að Trump tísti óánægju sinni með meðferðina á Stone, vini sínum. Lét hann milda refsikröfuna niður í þrjú til fjögur ár í fangelsi.

Allir saksóknararnir fjórir sögðu sig frá málinu í síðustu viku og einn þeirra sagði alfarið af sér embætti sínu hjá ráðuneytinu. Ákvörðun Barr hratt af stað miklum umræðum um sjálfstæði dómsmálaráðuneytisins undan pólitískum þrýstingi Trump forseta.

Hótaði vitni lífláti

Stone hefur verið persónulegur vinur Trump forseta um árabil. Hann var jafnframt óformlegur ráðgjafi forsetaframboðs Trump árið 2016. Í kosningabaráttunni reyndi hann að afla framboðinu upplýsinga um tölvupóstana sem Rússar stálu frá framboði Hillary Clinton, mótframbjóðanda Trump, og landsnefndar Demókrataflokksins.

Saksóknarar sökuðu Stone um að hafa logið í fimm atriðum um samskipti hans við Trump-framboðið og Wikileaks í framburði sínum fyrir leyniþjónustunefnd fulltrúardeildar Bandaríkjaþings í september árið 2017. Það hafi hann gert til að leyna því að hann hafi leikið lykilhlutverk í tilraunum Trump-framboðsins til að komast yfir tölvupóstana. Þá hótaði Stone samstarfsmanni sínum lífláti til þess að hann lygi að saksóknurum. Samstarfsmaðurinn hélt því engu að síður fram að það hafi ekki talið sér ógnað með því.

Stone er sjötti ráðgjafi Trump forseta sem hefur verið sakfelldur og sá síðasti sem var ákærður í Rússarannsókninni sem Trump hefur hamast gegn um árabil. Honum hefur verið lýst sem skrautlegum pólitískum ráðgjafa sem hefur sjálfur stært sig af því að vera pólitískur bragðarefur sem beitir bellibrögðum gegn andstæðingum.

Trump forseti náðaði og mildaði dóma yfir nokkrum hvítflibbaglæpamönnum í vikunni. Í gærkvöldi tísti hann myndskeiði frá Fox-sjónvarpsstöðinni þar sem þáttastjórnandinn Tucker Carlson sagði að Trump gæti náðað Stone. Trump hefur undanfarna daga áskilið sér algeran rétt til að grípa persónulega inn í sakamál.

Spurður að því hvort að hann ætlaði sér að náða Stone á þriðjudag sagði forsetinn: „Við sjáum hvað setur.“

Fréttin hefur verið uppfærð.