Sólveig Anna segir Björn Leví henda skít í láglaunakonur

Björn Leví Gunnarsson þingmaður Pírata segir að besta starf sem hann hafi gegnt um dagana sé að hafa verið starfsmaður á leikskóla. Ef launin væru hærri væri hann þar enn. Nema, launin eru of lág. Þrátt fyrir þetta hugnast honum ekki aðferðir Eflingar í kjarabaráttu starfsmanna leikskóla sem heyra undir kjarasamninga Eflingar, eða það sem heitir leiðbeinendur í kjarasamningum.

Maður útí bæ með mjög há laun

Sólveig Anna Jónsdóttir formaður Eflingar á erfitt með að leynda gremju sinni og skömm á þessum málflutningi en Björn Leví hefur lýst því yfir að hann styðji kjarabaráttu launafólks, en Eflingu styðji hann hins vegar ekki.

„Takk, maður útí bæ með mjög há laun, fyrir að kasta skít í risastóran hóp láglaunakvenna sem að berjast fyrir því að eiga kannski stundum nokkra þúsundkalla til eyða í sig sjálfar af því að baráttuaðferðir þeirra eru ekki þér að skapi,“ segir Sólveig Anna á Facebooksíðu sinni og lætur fylgja með umdeildum pistil Björns Levís. Sólveig Anna lætur þetta ekki duga heldur lætur hún fylgja með tjámerki, kúk sem er eiginlega til marks um að hún gefi skít í þingmanninn; í það minnsta pistil hans.

Þar segir þingmaðurinn meðal annars það að himinn og haf sé milli þess að styðja láglaunafólk og Eflingu, sem er stærsta stéttarfélagið.

Björn Leví telur styttingu vinnuviku ekki nægjanlega framarlega í kjaradeilu milli leikskólakvenna og borgarinnar. „Sú stytting sem náðist í lífskjarasamningunum var drasl. Var í raun bara tilfærsla á pásum en ekki eiginleg stytting vinnutíma.“

Vill standa með Dóru Björtu

Ýmsir sem taka til máls á síðu Sólveigar Önnu eiga reyndar erfitt með að skilja hvað Björn Leví er að fara, að hann styðji láglaunafólk, vilji að það sé á hærri launum en standi ekki með Eflingu? En, hann talar um að áróðursherferðin „sem er í gangi núna er heldur ekki eitthvað sem ég get stutt. Þar kristallast kannski helst munurinn á því að ég styð láglaunafólk en ekki Eflingu. Á meðan ég vona að þau nái góðum samningum þá get ég ekki stutt aðferðina.“

Ef að líkum lætur er hann þar að fetta fingur út í neyðarlega uppákomu í tengslum við fund sem Efling efndi til en var frestað vegna slakrar mætingar oddvita flokkanna í borgarstjórn. Þau sendu þeim pillur sem Dóra Björt Guðjónsdóttir, oddviti Pírata, var ósátt við. Hún sagði, líkt og Björn Leví, að Píratar stæðu með láglaunafólki, og það hefði ekki staðið á henni að mæta á fundinn en Efling hefur stillt kjarabaráttunni þannig upp að þeir sem ekki styðji Eflingu, styddu þar með ekki láglaunafólk. Þetta kemur fram í meðfylgjandi örpistli Dóru á Facebooksíðu hennar.

Ef þessum erjum Eflingar og Pírata má ráða að hin harða kjarabarátta fer út um víðan völl.