María Fjóla nýr forstjóri Hrafnistu

Hjúkrunarfræðingurinn María Fjóla Harðardóttir var í dag ráðin forstjóri Hrafnistuheimilanna frá og með 1. september næstkomandi. María Fjóla er sjötti forstjóri Hrafnistu og jafnframt fyrsta konan til þess að gegna starfinu.

Undanfarna mánuði hefur María Fjóla sinnt starfi forstjóra ásamt Sigurði Garðarssyni framkvæmdastjóra Sjómannadagsráðs en hún er einnig framkvæmdastjóri heilbrigðissviðs Hrafnistu.

María Fjóla tekur við starfinu af Pétri Magnússyni sem stýrði Hrafnistuheimilunum í tólf ár. Pétur tók við starfi forstjóra Reykjalundar þann 1. júní síðastliðinn. 

Hrafnista rekur í dag átta hjúkrunarheimili í fimm sveitafélögum. Hrafnista er önnur stærsta heilbrigðisstofnun landsins þegar litið er til fjölda íbúa, þjónustuþega og starfsfólks að því er fram kemur í fréttatilkynningu.