Hrað­akstur Ís­lendinga stór­aukist frá sama tíma­bili í fyrra

Hátt í hundrað ökumenn voru í liðinni viku kærðir fyrir að aka of hratt í umdæmi lögreglunnar á Suðurlandi. Að sögn lögreglunnar voru 75 prósent þeirra íslenskir ríkisborgarar og segir lögreglan að „ekkert þýði að bera fyrir sig að erlendu ferðamennirnir séu til vandræða.“ Frá sama tíma í fyrra hafi svipaður fjöldi ökumanna verið kærður fyrir of hraðan akstur og þá hafi aðeins fjórðungur verið með íslenskt ríkisfang.

„Ljóst er að við getum gert betur,“ skrifar lögreglan á Suðurlandi í tilkynningu. Tveir þeirra 97 ökumanna sem kærðir voru fyrir of hraðan akstur voru mældir á 140 km/klst hraða eða meira á vegi með 90 km/klst hámarkshraða. Þá voru tveir ökumannanna ungir og fengu með brotunum punkta í ökuferlisskrá sem kom þeim í eða yfir fjóra punkta.

Ökumennirnir ungu voru því settir í akstursbann og fá ekki að setjast aftur undir stýri fyrr en þeir hafa lokið námskeiði fyrir þá sem sæta akstursbanni. Þá voru þrír ökumenn grunaðir um akstur undir áhrifum áfengis og/eða fíkniefna.

Töluverður erill var á tjaldsvæðum á suðurlandi og þurfti lögregla að hafa einhver afskipti af ungmennum á tjaldsvæði við Laugarvatn um liðna helgi. Þá þurfti lögregla að stilla til friðar vegna óspekta á tjaldsvæðinu á Höfn. Einhverjir gestir höfðu „sinnt fótboltaæfingum inni á milli tjalda í óþökk annarra tjaldbúa.“

Rúða var brotin í kennslustofu við Norðurhóla á Selfossi í liðinni viku og rúða hafði einnig verið brotin í Fjölheimum á Selfossi. Bæði málin eru óupplýst og eru þeir sem hafa upplýsingar um málin beðnir að hafa samband við lögreglu. Þá voru rúður brotnar í bíl á sumarbústaðasvæði við Laugarvatn á sunnudagsmorguninn. Meintur gerandi var handtekinn á vettvangi og yfirheyrður um málsatvik en gat litlar skýringar gefið.