Helsti and­stæðingur Lúka­sjen­kó hand­tekinn í að­draganda kosninga

Lögregla í Hníta-Rússlandi hefur handtekið helsta andstæðing Alexander Lúkasjenkó forseta, en forsetakosningar eru fyrirhugaðar í landinu í ágúst.

Viktor Babariko, 56 ára gamall bankamaður, var handtekinn vegna gruns um fjármálaglæpi, en hvítrússnesk yfirvöld hafa handtekið fjölda stjórnarandstæðinga síðustu misserin. Talsmaður yfirvalda saka Babariko um að vera í slagtogi við „rússneska strengjabrúðumeistara“ og hafa stundað ólöglegt athæfi.

Mörg hundruð manns hafa mótmælt handtökunum á götum höfuðborgarinnar Minsk.

Lúkasjenkó hefur gegnt embætti forseta í landinu frá árinu 1994 og sækist nú eftir að stýra landinu sjötta kjörtímabilið.

Þrítugur sonur Babariko, Eduard, var einnig handtekinn í aðgerðum lögreglu, en hann hefur stýrt kosningabaráttu föður síns. Feðgarnir voru handteknir þegar þeir voru í þann mund að afhenda undirskriftir vegna framboðsins.

Babariko var einu sinni forstjóri Belgazprombank, hvíttrússnesks dótturfélags rússneska orkurisans Gazprom.