Segir Trump hafa biðlað til Xi um að­stoð til að tryggja vin­sældir á kosninga­ári

John Bolton, fyrrverandi þjóðaröryggisráðgjafi Donalds Trump Bandaríkjaforseta, fullyrðir í nýrri bók sem enn er ekki komin út, að Trump hafi beðið Xi Jinping Kínaforseta um aðstoð við að ná endurkjöri í komandi forsetakosningum í Bandaríkjunum sem fram fara í nóvember.

Bolton segir að Trump hafi farið fram á það við Xi að Kínverjar myndu kaupa mikið magn landbúnaðarvara frá Bandaríkjunum til að tryggja vinsældir forsetans í landbúnaðarhéruðum Bandaríkjanna.

Xi Jinping mun hafa tekið heldur dræmt í hugmyndina, en þó lofað að setja landbúnaðarmál í forgrunn í viðræðum ríkjanna um viðskiptasamninga.

Stjórn Trump reynir nú hvað hún getur til að koma í veg fyrir útgáfu bókarinnar en forsetinn fær vægast sagt lélega einkunn hjá Bolton. Auk þess að betla aðstoð af Xi Jinping á Trump einnig að hafa hvatt hann til að byggja fleiri fangabúðir fyrir Úígúra, minnihlutahóp múslima í Kína.

Þessi ummæli skjóta skökku við ekki síst í ljósi þess að opinberlega hefur Trump og stjórn hans gagnrýnt Kínverja harðlega fyrir framkomu þeirra í garð Úígúra og nú síðast hótað viðskiptaþvingunum.

Bolton gegndi stöðu þjóðaröryggisráðgjafa Bandaríkjaforseta frá apríl 2018 til september 2019.