Stórt verkefni flugvirkja að vernda flugflota Icelandair

Meirihluti flugvirkja Icelandair sinnir nú sérhæfðu geymsluverkefni, sem er að verja kyrrsettar flugvélar skemmdum svo þær verði klárar til flugs á ný um leið og þörf verður fyrir þær. Frá þessu var greint í fréttum Stöðvar 2.

Flugvélar eru smíðaðar til að fljúga en ekki til að standa kyrrar á jörðinni vikum og mánuðum saman. Af um þrjátíu þotum Icelandair eru aðeins þrjár þessa dagana að fljúga með farþega. Hinum farþegaþotunum er búið að pakka inn í geymsluumbúðir meðan fraktvélarnar hafa næg verkefni.

Snúrur og slöngur, sem við sjáum liggja upp í hreyflana á útistæðum, eru liður í því að tryggja varðveislu flugvélanna. Jens Þórðarson, framkvæmdastjóri flugrekstrarsviðs Icelandair, segir það heljarinnar verkefni.

„Já, þetta er mjög stórt verkefni og hver einasta flugvél þarf töluverða athygli, bæði til að koma henni í geymslu og svo til að viðhalda henni meðan á geymslu stendur,“ segir Jens.

Sumar þoturnar eru í skammtímageymslu og aðrar í langtímageymslu, eins og sú sem við sáum inni í flugskýli en þar voru flugvirkjar að setja tæringarvörn á eldsneytiskerfi hreyfilsins. Síðan var flugskýlið opnað því ræsa átti hreyfilinn.

„Það eru sum verk sem þarf að vinna á þriggja daga fresti, önnur á sjö daga fresti, sum á tveggja vikna fresti, og allt upp í sum á mánaðarfresti, sem þarf þá að eiga sér stað allan tímann. Þannig að það er nóg að gera hjá fólkinu hérna bara við það að halda utan um þær vélar sem eru í geymslu hér á vellinum,“ segir Jens.

Þetta er raunar aðalverkefni meirihluta flugvirkjanna þessa dagana; að sjá til þess að vélarnar haldist flughæfar og skemmist ekki. Besti geymslustaðurinn fyrir þær væri samt þurr eyðimörk, særokið á Miðnesheiði er því áskorun.

„Þetta snýst líka mikið um það bara hreinlega að þvo vélarnar, þrífa af þeim reglulega.“

Svo er límt fyrir alla opnanlega fleti.

„Það er einfaldlega til að reyna að tryggja að það sé eðlilegt rakastig í vélinni, vegna þess að raki er mikill óvinur flugvéla.“

Jens segir að nú komi sér vel að hafa stór og góð flugskýli.

„Það eru gríðarlega mikilvægir innviðir fyrir Icelandair að eiga svona aðstöðu, og eiga þessa þekkingu, til þess að vera tilbúin í þann rekstur sem félagið þarf á að halda um leið og kallið kemur,“ segir framkvæmdastjóri flugrekstrarsviðs Icelandair.

Hér má sjá frétt Stöðvar 2: