Bein út­sending: Hvað eru skammta­tölvur?

Farið verður yfir eiginleika skammtatölva í Þriðjudagsfyrirlestri Háskólans í Reykjavík sem hefst á slaginu 12. Sigurður I. Erlingsson, prófessor og forstöðumaður grunnnáms við verkfræðideild, mun þar reyna að varpa ljósi á hvers vegna skammtatölvur geti verið mikið öflugri en venjulegar tölvur.

Í tilkynningu á vef skólans segir að undanfarin ár hafi komið í fjölmiðlum fréttir um að búið sé að smíða skammtatölvur og þar með hafi hefðbundum tölvum nánast verið rutt úr vegi.

„En er eitthvað til í slíkum fullyrðingum? Í þessum fyrirlestri verður farið í eiginleika skammtatölva og reynt að varpa ljósi á af hverju þær geti verið miklu öflugri en hefðbundnar tölvur. Til að skilja eiginleika skammtatölva, og þá sérstaklega af hverju það er erfitt að búa þær til, þá þarf að þekkja grunnatriði skammtafræði og verða þau útskýrð á aðgengilegan hátt eins og kostur er. Að lokum ræðum við þær hagnýtingar skammtatölva sem líklegastar eru að komast í gagnið í náinni framtíð,“

Hægt verður að fylgjast með útsendingunni að neðan.