Kíktu í einn flottasta bílskúr landsins hjá KR-hetju

Heimsóknir í bílskúra eru fastir liðir í Sportinu í dag sem er alla virka daga klukkan 15:00 á Stöð 2 Sport.

Í þætti gærdagsins kíkti Henry Birgir Gunnarsson í skúrinn hjá gamalli KR-hetju, Þorgeiri Guðmundssyni.

Hann lék með KR í fótbolta á yngri árum og tók m.a. þátt í fyrsta Evrópuleik liðsins gegn Liverpool 1964.

Seinna sneri Þorgeir sér að pílukasti og hefur nokkrum sinnum orðið Íslandsmeistari í greininni.

Í skúrnum hans Þorgeirs kennir ýmissa grasa eins og áhorfendur Stöðvar 2 Sports fengu að sjá í gær. Þar er að sjálfsögðu píluspjald, billjardborð og bar. Þorgeir geymir einnig alla verðlaunagripi sína í skúrnum, á veggjunum eru úrklippur úr dagblöðum frá ferlinum auk fjölda minjagripa.

„Við bjuggum í Bandaríkjunum í ellefu ár. Þegar við fluttum heim tók ég þetta billjardborð og barinn, sem voru í kjallaranum úti, með mér. Ég fékk alls ekki að setja það inn í stofu þannig ég lengdi bílskúrinn um þrjá metra. Þetta var það fyrsta sem ég gerði, 1990,“ sagði Þorgeir sem er enn á fullu í pílukastinu þrátt fyrir að vera orðinn 75 ára.

Innslagið í heild sinni má sjá hér fyrir neðan.